लुम्बिनी प्रदेशसभामा मंगलबार रोल्पाको निर्वाचन क्षेत्र २ बाट निर्वाचित सांसद दीपेन्द्रकुमार पुन मगर ‘सिजल’ले स्थानीय तहका जनप्रतिनिधिले व्यसायीसँग दुई करोड रुपैयाँ मागेको आरोप लगाएका छन्।
गत प्रदेशसभा निर्वाचनमा स्वतन्त्र रूपमा चुनाव जिते पनि पछि नेकपा (माओवादी केन्द्र) प्रवेश गरेका सिजलले आफ्नै राजनीतिक थलो रोल्पाको त्रिवेणी गाउँपालिकाको अध्यक्ष र उपाध्यक्षमाथि यस्तो आरोप लगाएका हुन्।
गत स्थानीय तह निर्वाचनमा रोल्पाको त्रिवेणी गाउँपालिका अध्यक्षमा नेकपा (एमाले) बाट अध्यक्षमा कर्णबहादुर बाँठा मगर र उपाध्यक्षमा नेपाली कांग्रेसका लेखमणि डाँगी निर्वाचित भएका थिए ।
त्रिवेणी गाउँपालिका वडा नम्बर ३ रानागाउँमा रोल्पा चुनढुंगा प्रालि र शिवस्वरूप खनिज उद्योग प्रालिले उत्खननको काम गर्दै आएका छन्।
अहिले पनि बुढागाउँ क्षेत्रमा उत्खननको काम व्यवसायी पिएल संघाइले गरिरहेका छन्।
पूर्वमन्त्रीसमेत रहेका माओवादी नेता सिजलले गाउँपालिका अध्यक्ष मगर र उपाध्यक्ष डाँगी निर्वाचित भएपछि काठमाडौंमा संघाइलाई भेट्न गएको बताएका छन्।
काठमाडौं गएका बेला कार्यालयमा नभेटी होटलमा भेट्न गएको र त्यही बेला दुई करोड रुपैयाँ मागेको सिजलको दाबी छ।
‘संघाइलाई होटमा बोलाएर उपाध्यक्षले चुनाव खर्चमा भएको खर्च भन्दै दुई करोड मागे,’ सिजलले भने, ‘संघाइले व्यक्तिगत रूपमा पैसा नदिने बरू विकास–निर्माणतर्फ बाटोघाटो वा पानीको प्रबन्धमा खर्च गर्ने प्रस्ताव गरेछन्। त्यसपछि अध्यक्ष र उपाध्यक्षले उत्खननको काम आफूहरूलाई दिन प्रस्ताव गरेका रहेछन्।’
अहिले उत्खननको काम प्रेम पुनले गर्दै आएका छन्। गाउँपालिका अध्यक्ष र उपाध्यक्षलाई पुनले गरेको उत्खनन चित्त नबुझेकाले उनीबाट खोसेर आफूलाई दिन भनेपछि संघाइले त्यो पनि अस्वीकार गरेको दाबी सिजलको छ।
व्यवसायी संघाइले पुनले विगत १२ वर्षदेखि उत्खननको काम गर्दै आएकाले उनीबाट खोस्न नसक्ने जवाफ दिएपछि मुद्दामामिला चलेको सिजलको भनाइ छ।
मुद्दामामिलाको अग्रभागमा स्थानीय देखिए पनि त्यसको पृष्ठभूमिमा गाउँपालिका अध्यक्ष र उपाध्यक्ष नै भएको सिजलले बताएका छन्।
अहिले मुद्दा सिमेन्ट उद्योगले जितिसकेको छ।
त्यसपछि अध्यक्ष, उपाध्यक्षले स्थानीयलाई उक्साएर उद्योगकाविरूद्ध आन्दोलन गर्न लगाएको सिजलको भनाइ छ।
एमालेबाट निर्वाचित तत्कालीन गाउँपालिका अध्यक्ष (पूर्व अध्यक्ष) शान्तकुमार वलीले वातावरण मूल्याङकनको स्वीकृति दिए पनि अहिले आएर उनैले संघर्ष समितिको नेतृत्व गर्दै आन्दोलन थाल्नु आश्चर्यजनक भएको सिजलको भनाइ छ।
त्यसको आलोचना भएपछि पछिल्लो समय एमालेका अर्का नेता ओमराज घर्तीर्लाइ संघर्ष समितिको संयोजक बनाएको पनि सिजलले बताएका छन्।
मंगलबारको सदनमा कांग्रेस र एमालेको गठबन्धनले व्यवसायीलाई गरी खान नदिने गरी दुःख दिएको बताएका थिए।
‘चर्चा के सुनिन्छ भने– कांग्रेस–एमालेले के गर्नु हुन्छ रे भने कोही व्यापार गरेर खान थालेको छ भने कोहीले उन्नति प्रगति गर्न थाल्यो भने त्यसलाई कि त आफ्नो पार्टीमा ल्याउन भरपुर प्रयत्न गर्ने, भएन भने त्यसलाई सताएर लखेट्ने र त्यसपछि त्यहाँ आफ्नो मान्छे स्वतः भर्ना गर्ने नियत राखेका छन् भन्छन्,’ उनले भनेका थिए।
प्रदेश सभा सदस्य सिजलको उक्त भनाइपछि गाउँपालिका अध्यक्ष र उपाध्यक्षले विज्ञप्ति निकालेर विरोध जनाएका छन्। उनीहरूले आरोपको पुष्टि गर्न चुनौती दिएका छन्।
व्यवसायी संघाइसँग २ करोड रुपैयाँ मागेको आरोप निराधार रहेको बताउँदै उनीहरूले प्रदेश सांसदको अभिव्यक्ति चरित्र हत्या गर्ने, मानहानी गर्ने, त्रिवेणीवासी जनताको अपमान गर्ने प्रकृतिको रहेको बताएका छन्।
‘यस प्रकारको कपोलकल्पित भ्रामक अभिव्यक्तिको घोर निन्दा एवं भर्त्सना गर्दछौं। हामीले उद्योगीबाट दुई करोड रुपैयाँ मागेको प्रमाण जनता र सम्बन्धित निकायमा पेस गर्नुहुन चुनौती दिन्छौं,’ उनीहरूले भनेका छन्।
