अख्तियार दुरूपयोग अनुसन्धान आयोगले डिभिजन वन कार्यालय मकवानपुरका तत्कालीन वनअधिकृत प्रल्हाद प्रसाद धिताल, स्थानीय ब्रम्ह आधारभूत विद्यालयका प्रधानाध्यापक राम घोरसाइली समेत २० जना उपर भ्रष्टाचार मुद्दा लगाएको छ।
उनीहरूले मकवानपुरको बकैया गाउँपालिका २ मा रहेको ब्रम्ह सामुदायिक वनका रूख कटान गर्दा कटान गर्दा एक करोड ५८ लाख हानीनोक्सानी गरेको अख्तियारले जनाएको छ।
अख्तियार प्रवक्ता प्रदिप कुमार कोइरालाले विज्ञप्ति जारी गर्दै उनीहरूविरूद्ध मंगलबार विशेष अदालतमा मुद्दा दायर गरेको जनाएका छन्।
ढलेका सालका रूख छपान गर्नुपर्नेमा हरिया रूख मासेको, रूख मास्नका घुस लिएदिएको र अन्य अनियमितता पनि गरेको उनीहरूमाथि आरोप छ।
'२६२ वटा रुखहरू मात्र कटान गर्नुपर्नेमा बदनियतपूर्वक छपान गरेका रुखहरूको आसपासमा नै रहेका अन्य छपान नगरेका हरिया सग्ला खडा साल जातको २०८ वटा रूखहरू कटान गरी गोलिया ८८७ थान टुक्रा पारी ९४९७.७८ क्यूफिट काठको एक करोड ५८ लाख ७० हजार सात सय ९० रूपैयाँ हानिनोक्सानी पुर्याएको पुष्टि हुन आएको,' अख्तियारको अभियोगपत्रमा उल्लेख छ।
उपभोक्ता समूहका अध्यक्ष मर्दन सिं थिङसहित तत्कालीन डिभिजनल वन अधिकृत प्रल्हाद प्रसाद धिताल, सहायक वन अधिकृत विशाल भट्टराई, सहायक वन अधिकृत टंक नारायण श्रेष्ठ, सहायक वन अधिकृत नारायण बहादुर कार्की, अवकाश प्राप्त सहायक वन अधिकृत मोहन बहादुर खड्का, सहायक वन अधिकृत राजेन्द्रमान राजभण्डारी, सहायक वन अधिकृत दशराम चौधरी, रेन्जर राजु लामा, फरेष्टर ब्रहमदेव यादव र वन रक्षक देवि प्रसाद गौतम, होटल सामना प्रा.लि. हेटौंडा - ४, मकवानपुरका संचालक सानुकाजी आचार्य, सामना काष्ठ उद्योग गाईघाट, उदयपुरका संचालक सुरज आचार्य, ब्रम्ह सामुदायिक वन उपभोक्ता एवं सल्लाहकार जिवन भन्ने भिम बहादुर थिङ, ब्रम्ह आधारभूत विद्यालय, बकैया-२ मकवानपुरका तत्कालीन प्रधानध्यापक राजन भन्ने राम बहादुर घोरसाईनी, काठ ठेकेदार केशव भन्ने इन्द्रमणि तिमल्सिना, काठदाउरा संकलन गर्ने प्रयोजनका लागि गठित समितिका संयोजक बुद्ध बहादुर लोप्चन, सदस्यहरू सोम बहादुर तिमल्सिना, सूर्ज बहादुर जिम्बा भन्ने सूर्य बहादुर जिम्बा, ब्रम्ह सामुदायिक वन उपभोक्ता समूहका अध्यक्ष मर्दन सिं थिङ, कोषाध्यक्ष शुक्र बहादुर भोलन भन्ने शुक्र बहादुर भुलनको पनि यो अनियमिततामा प्रत्यक्ष योजना, मिलेमतो र संलग्नता रहेको अख्तियारले जनाएको छ।
उनीहरूलाई कानुनअनुसार, जरिवाना, कैद र विगो जफत गर्नुपर्ने अख्तियारको माग छ।
-1746009348.jpg)
