सर्वोच्च अदालतले नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीका काठमाडौं उपत्यका इन्चार्ज सूर्यबहादुर भुजेललाई थुनामुक्त गर्ने आदेश दिएको छ।
उनलाई प्रत्येक दिन ललितपुर प्रहरी परिसर मा उपस्थित हुनुपर्ने गरि छोड्न शुक्रबार आदेश दिएको सर्वोच्चले जनाएको छ।
फागुन १० गते ललितपुरको नख्खुस्थित एनसेल टावरअघि एकजनाको ज्यान जाने गरी बम विस्फोट गराएको भन्दै प्रहरीले उनलाई फागुन १५ गते कलंकीबाट पक्राउ गरेको थियो।
चैत २७ गते पितकुमारी भुजेलले सूर्य भूजेललाई प्रहरीले गैरकानुनी थुनामा राखेको भन्दै सर्वोच्चमा बन्दिप्रत्येक्षीकरण रिट दिएकी थिइन्।
सोही रिट जारी गर्दै शुक्रबार न्यायाधीश अनिल सिन्हा र पुरूषोत्वम भण्डारीको इजलासले सूर्य भूजेललाई थुनामुक्त गर्ने आदेश दिएको हो।
फागुन १० गते नख्खुस्थित एनसेलको मुख्य कार्यालयमा बम बिस्फोट हुँदा लमजुङका ४९ वर्षीय सिंहप्रसाद गुरूङको मृत्यु भएको थियो। बिस्फोटमा ललितपुर(४ की २६ वर्षीया प्रतिक्षा खड्का र बनेपाकी २५ वर्षीया उरूसा मानन्धर घाइते भएका थिए।
यो घटनापछि प्रहरीले विप्लव कार्यकर्ता सूर्य भूजेललाई पक्राउ गरेको थियो। नुवाकोट साबिक तारुका गाविस २ का ३८ वर्षीय भूजेललाई प्रारम्भमा बम बिस्फोटन एवम् कर्तव्य ज्यान मुद्दा चलाइएको छ।
