प्रधानमन्त्री केपी शर्मा ओलीले अख्तियार दुरूपयोग अनुसन्धान आयोगका तत्कालिन आयुक्त राजनारायण पाठकले घुस लिएको डाबोस जानुअघि थाहा पाएका थिए। तर, भिडियो भने देखिसकेका थिएनन्।
भक्तपुरको चाँगुनारायणस्थित नेपाल इन्जिनियरिङ कलेजका सञ्चालकसँग ७६ लाख घूस लिएको प्रकरणकै कारण गत शुक्रबार पाठकले आयुक्तबाट राजीनामा दिइसकेका छन्। त्यसमाथि अनुसन्धान गर्न अख्तियारले विशेष टोली गठन गरेको छ।
भ्रष्टाचार गर्नेलाई नै कारबाही गर्ने जिम्मा पाएका पाठकले सेवाग्राहीसँग घूस लिएको भिडियो प्रधानमन्त्री ओलीले ४ महिनाअघि नै देखिसकेका थिए भन्ने चर्चा छ।
‘पाठकले घूस लिएको सूचना मात्र पनि उहाँले एक महिना अघिमात्र थाहा पाउनुभएको हो,’ स्रोतले भन्यो।
प्रधानमन्त्रीलाई थाहा भएपछि यो विषय नेपाल कम्युनिष्ट पार्टी संसदीय दलका उपनेता सुवासचन्द्र नेम्वाङ, महान्यायाधीवक्ता अग्नी खरेललगायत केही व्यक्तिलाई मात्र थाहा भयो। उनीहरूले भिडियो लिने व्यक्तिलाई सम्पर्क गरे।
तर, पाठकले लिएको घूस प्रकरणको भिडियो कारबाही हुने सुनिश्चित नभएसम्म नदिने अडान ती व्यक्तिले दिए। उनले आफूलाई पाठकले धम्की दिइरहेको भन्दै भिडियो देखाउन मानेनन्। भिडियो प्रधानमन्त्री ओली र नेकपाका अध्यक्ष पुष्पकमल दाहालबाहेक अरूलाई नदेखाउने उनको अडान थियो।
प्रधानमन्त्री डाबोसबाट फर्कीसकेपछि पनि उनीसँग भेटघाटको चाँजो मिलेन। त्यसैबीच मिडियामा पाठकको घूस प्रकरण सार्वजनिक भयो।
त्यसपछि नेपाल कम्युनिष्ट पार्टीले पाठकलाई संसदमा महाअभियोग लगाउने तयारी थाल्यो। तर, प्रमाण हात लागिसकेको थिएन।
'प्रमाण नभई महाअभियोग लगाउन नमिलेपछि तीन दिनसम्म रोकिनुपर्यो,’ प्रधानमन्त्री सचिवालय स्रोतले भन्यो।
गत साता मात्रै प्रधानमन्त्रीसँग ती व्यक्तिको भेट भयो। प्रधानमन्त्री सँगको भेटमा नेम्वाङ पनि सँगै थिए। भिडियो खिच्ने ती व्यक्तिले एक हातले मोबाइलमा भिडियो अन गरेर प्रधानमन्त्रीलाई देखाए भने अर्को हातले पेन ड्राइभ नेम्वाङलाई दिए। पेनड्राइभमा घूसप्रकरणको नौ मिनेट लामो भिडियो थियो।
तर ती व्यक्तिसँग भने यो प्रकरणको ९/१० घण्टा लामो अडियो/भिडियो भएको स्रोतले बतायो। त्यो तीन चरणमा लिइएको छ। पहिलो, पाठकले घुस लिएको अडियो। दोस्रो उनले घूस लिएको स्वीकार गरेको भिडियो। तेस्रो उक्त स्वीकारोक्तिको भिडियो पाठक आफैंले हेरेर आत्तिएको र डिलिट गर्न दबाब दिएको।
उक्त भिडियो प्रधानमन्त्री कार्यालयमै छ। भिडियो हेरेर महाअभियोग तयारी गर्दा गर्दै पाठकले राजीनामा दिए। उक्त भिडियो प्रधानमन्त्री कार्यालयले अख्तियार पठाउने भएको छ।
‘अख्तियारले पाठक विरूद्ध थालेको अनुसन्धान यो भिडियो बिना अघि बढ्दैन त्यसैले प्रधानमन्त्री कार्यालयले पठाइदिने भएको छ,' स्रोतले भन्यो।