पाकिस्तानको एउटा अदालतले भ्रष्टाचारको अभियोगमा दोषी ठहर गरेपछि कैद काटिरहेका पूर्वप्रधानमन्त्री नवाज शरिफलाई रिहा गर्न आदेश दिएको छ।
बिबिसिका अनुसार शरिफले जेलसजाय काट्न शुरू गरेको दुई महिनापछि अदालतले यस्तो आदेश दिएको हो।
आमनिर्वाचन भएको केही समयपछि अदालतले गत जुलाइमा उनलाई र उनकी छोरी मरियमलाई भ्रष्टाचारको अभियोगमा दोषी ठहर भएका दुबैलाई यसअघि सुनाइएको फैसलालाई रद्द गरेको छ।
पुनरावलोकनका लागि उनीहरूले दिएको निवेदनमाथि सुनुवाइ गर्दै अदालतले पछिल्लो आदेश दिएको हो।
दुवैजनाले गलत काम गरेको भन्ने आरोप अस्वीकार गर्दै आएका छन्।
शरिफकी क्यान्सरपीडित श्रीमती कुलसूम नवाजको उपचारका क्रममा लण्डनमा निधन भएको एक हप्तापछि अदालतको आदेश आएको छ।
अन्तिम संस्कारमा सहभागी हुन बुवा र छोरीलाई अनुमति दिइएको थियो। तर फेरि उनीहरूलाई जेल पठाइएको थियो।
बुधवार अबेर जमानतमा उनीहरू रिहा हुने अपेक्षा गरिएको छ।
मध्यलण्डनस्थित चारवटा विलासी सम्पत्तिको स्वामित्वसम्बन्धी भ्रष्टाचारको मुद्दामा गत जुलाईमा शरिफ दोषी ठहर भएका थिए।
उनले आफूविरुद्धको अभियोग राजनीतिक रूपले अभिप्रेरित भएको बताउने गरेका छन्।
त्यस्तै एउटा अपराध गरेको अभियोगमा मरियमलाई सात वर्ष र मुद्दामा सहयोग नगरेकोमा एक वर्ष जेलसजाय सुनाइएको थियो।
मुद्दामा नसघाएको भन्दै शरिफका ज्वाइँ सफ्दर अवानलाई पनि एक वर्ष जेल सजाय सुनाइएको थियो।
तीनैजनाको पुनरावेदनमाथि सुनुवाइ गर्दै बुधवार इस्लामाबाद उच्च अदालतले उनीहरूविरुद्धको फैसला निलम्बन गर्न आदेश दिएको हो।