शोभराजले भने आफूमाथि सुरक्षा खतरा रहेको दाबी गर्दै आएका छन् । अस्पतालमै आफ्नो हत्या हुन सक्ने भन्दै केही व्यक्तिको नाम नै लिएको केन्द्रीय कारागारका एक अधिकारीले बताए । युनुस अन्सारीलगायतका व्यक्तिले अस्पतालमा आफूमाथि आक्रमण गर्न सक्ने भन्दै उनले प्रहरीलाई सचेत गराएका छन् । उनले भनेजस्तै आक्रमण हुन सक्ने अथवा उनी आफैँ भाग्न सक्ने डरकै कारण उनलाई केन्द्रीय कारागारको गोलघरभित्र राखिएको थियो ।
नौ प्रहरीको घेरामा शोभराज
नाटकीय शैलीमा भाग्दै आएको इतिहास भएकाले शोभराजलाई अस्पताल लैजान पनि प्रशासनलाई ठूलै चुनौती थियो । विभिन्न बहानामा विभिन्न देशका जेलबाट भाग्न सफल शोभराज फेरि पनि उम्कन सक्ने डरले सुरक्षा अधिकारी पनि सचेत भएका थिए । अस्पताल नै कसरी लग्ने भन्ने विषयमा समेत ठूलो आन्तरिक बहस चलेको थियो । तर, केन्द्रीय कारागारका डिएसपी जनक शाहीले सुरक्षाको जिम्मा आफूले लिने बताएपछि उनलाई अस्पताल लगिएको हो ।
अस्पतालमा पनि उनलाई कडा सुरक्षा घेरामा राखिएको छ । उनको सुरक्षामा सइको कमान्डमा नौ प्रहरी खटिएका छन् । सामान्यतया कैदीको सुरक्षामा दुई–तीनजना मात्र प्रहरी खटिन्छन् । सुरक्षाकै कारण देखाउँदै शोभराजको फोटोसमेत खिच्न नदिन गृह मन्त्रालयले प्रहरीलाई निर्देशन दिएको छ ।
अप्रेसनका लागि दूतावासको मञ्जुरीनामा
शोभराजको अप्रेसनका लागि काठमाडौंस्थित फ्रेन्च दूतावासका अधिकारीले मञ्जुरीनामामा आइतबार हस्ताक्षर गरेका छन् । सुरुमा शोभराजले आफ्नो अप्रेसन नै गर्न मानेका थिएनन् । पछि फ्रान्सकै डाक्टरहरूसँग सरसल्लाह गरेपछि उनी अप्रेसनका लागि तयार भएका हुन् ।
तर, अप्रेसन सफल हुनेमा शोभराज विश्वस्त छैनन् । चिकित्सकहरूका अनुसार पनि मुटुको भल्भ अप्रेसन सफल हुने सम्भावना सामान्यतया ४० प्रतिशत हुन्छ । अर्थात् यस्तो अप्रेसन ९ मा ४ जनाको मात्र सफल हुन्छ । ७३ वर्षीय शोभराज शारीरिक रूपमा निकै कमजोर भएकाले पनि उनी अप्रेसनमा डराएका हुन् ।
-1746009348.jpg)
