युवा पुस्ता र रमाइलो गर्न चाहनेलाई लक्ष्य गर्दै काठमाडौंको दरबारमार्गमा चारतारे होटल 'मोक्सी काठमाडौं' सञ्चालनमा आएको छ।
हाल सञ्चालनमा रहेका होटलहरूभन्दा फरक अनुभव गराउन एमएस समूहले मोक्सी सञ्चालनमा ल्याएको हो।
विश्व प्रसिद्ध मेरियट ग्रुप अन्तर्गतको 'मोक्सी' ब्रान्डको यो होटल नेपालमा पहिलो पटक भित्रिएको हो। उद्योगी तथा होटल व्यवसायी शशिकान्त अग्रवालले मोक्सी नेपाल भित्र्याएका हुन्।
मोक्सी विश्वका २९ देशमा फैलिएको अग्रवालले बताए। काठमाडौंमा खुलेको मोक्सी अन्तर्राष्ट्रिय मापदण्ड अनुसारकै ढाँचामा सजिएको उनको भनाइ छ।
'हामीकहाँ थुप्रै होटल छन्। तिनीहरूले दिने सेवा प्रायः उस्तै प्रकृतिको छ,' अग्रवालले भने, 'त्यसैले हामीले पहिलो पटक फरक सेवा पस्किन मोक्सी ल्याएका हौं।'
मोक्सीमा ट्रेन्डी लुक्स अर्थात् रंगीबिरंगी सजावट छ।
उनका अनुसार मोक्सी विशेष गरी सोखिन, खर्च गर्नेहरूका लागि हो जहाँ स्वतन्त्र अनुभव र लक्जरियस बसाइलाई प्राथमिकता दिइनेछ। होटलमा विदेशीसँगै स्वदेशी पर्यटकलाई पनि मध्यनजर गरिएको छ।
'मोक्सी काठमाडौंले नयाँ जमातका पर्यटकलाई आकर्षण गर्छ भन्ने विश्वास छ,' उनले थप भने, 'अहिले मानिसहरू घुमफिरसँगै बार तथा क्लबमा जानेको जमात बढ्दो छ। हामीले उनीहरूलाई लक्ष्य गरेका हौं।'
यो होटलको जिम्मेवारी अग्रवालले छोरालाई दिएका छन्। यसको अवधारण पनि छोराकै भएको उनले बताए।
मोक्सी रहेको दुई रोपनी जमिन अग्रवालले १२ वर्षअघि किनेका हुन्।
कोरोना महामारी फैलिनुअघि यहाँ होटल बनाउन थालिएको हो। तीन वर्षमा बनाइसक्ने भनिए पनि विभिन्न कारणले निर्माणमा ढिलाइ भयो।
सन् २०२५ डिसेम्बरबाट सञ्चालनमा आएको मोक्सीमा एक अर्ब ९० करोड रूपैयाँ लगानी भएको अग्रवालले बताए।
बाह्र तलाको मोक्सी होटल पूरै रंगीबिरंगी छ। परबाट हेर्दा खुलाबी रङले आँखा खिच्ने यसको भुइँतलाबाटै संगीतमय वातावरण सुरू हुन्छ। अन्य होटलमा जस्तो शान्त र आरामका लागि लबी यहाँ छैन।
युवादेखि बालबालिकालाई समेत लक्ष्य गरिएको भुइँतलामा भिडिओ गेम, डिजे, लाइब्रेरी, अल डे डाइनिङ र कफी सप छ।
पहिलो तलादेखि १० औं तलासम्म एक सय १ वटा कोठा छन्। फरक लुक्सका लागि कोठा अनुसार फरक रङ र तस्बिरहरू टाँसिएको छ।
अन्य होटलमा जस्तो पाहुनाका लागि लुगा राख्ने दराज छैन। युवा लक्षित भएकाले भित्तामा लुगा झुन्ड्याउने ह्यांगर राखिएको छ।
कोठाहरूलाई मोक्सी ठमेल, मोक्सी दरबारमार्ग र मोक्सी क्वीन, मोक्सी ट्वीन नाम दिइएको छ। यी कोठामा नाम अनुसारकै स्थानको झल्को दिलाउने कोशिस गरिएको अग्रवालले बताए।
होटलमा मोक्सी ठमेल ६ वटा, मोक्सी दरबारमार्ग १० वटा, मोक्सी क्वीन ५५ वटा र मोक्सी ट्वीन ३० वटा छन्। यिनमा बस्न एक रातको १० हजारदेखि २० हजार रूपैयाँसम्म पर्छ।
११ औं तलामा मेक्सिकन रेस्टुरेन्ट, डिजे, बार र स्विमिङ पुल छ। मनोरञ्जनकै लागि खोलिएकाले यहाँ सभा हल तथा बैंक्वेट छैन।
होटलका पाहुनाहरूका साथै बाहिरी आगन्तुक पनि मेक्सिकन खाना खान मोक्सी आइपुग्ने उनीहरूको अपेक्षा छ।
'पछिल्लो समय इन्डियन, थाईसहित मेक्सिकन खाना पनि चल्तीमा छ,' उनले भने।
अहिले धमाधम नयाँ होटलहरू खुलिरहेका छन्। त्यसैले प्रतिस्पर्धा र जोखिम धेरै छ।
तर मोक्सी नयाँ स्वादको भएकाले पर्यटक तान्ने अग्रवालको विश्वास छ।
लक्जरी होटल भए पनि मोक्सी तुलनात्मक रूपमा किफायती भएको पनि उनले बताए।
'भविष्यको बजार सोचेर लगानी गरेका हौं,' उनले भने, 'नेपालमा पनि मोक्सी खुलेछ, त्यसैले नेपाल जानुपर्छ भन्ने पर्यटक हुन सक्छन्। यसको बजार राम्रो हुने विश्वास छ।'
सबै तस्बिरः नवीनबाबु गुरूङ/सेतोपाटी
-1746009348.jpg)
