विश्व पर्यटन दिवसको अवसरमा रुपन्देहीमा पर्यटकहरुलाई सम्मान गरिएको छ।
नेपाल-भारत सीमा नाका बेलहियाबाट नेपाल प्रवेश गर्ने अस्ट्रेलिया, नेदरल्याण्ड्स र भारतका गरी चारजना पर्यटकलाई सीमा नाकामै पुगेर स्वागत र सम्मान गरिएको हो।
नेपाल एशोसियन अफ ट्राभल्स एन्ड टुर एजेन्ट (नाट्टा) लुम्बिनीले विश्व पर्यटन दिवसका अवसरमा शनिवार बेलहिया नाका हुँदै नेपाल प्रवेश गर्ने पहिलो चारजना पर्यटकलाई सम्मान गरेको हो।
रुपन्देहीका पर्यटन व्यवसायीहरु शनिबार बिहान ९ नबज्दै नेपाल-भारत सिमानाका बेलहियाको दसगजा पुगेका थिए। बेलहियामा निर्माण गरिएका प्रवेशद्वारमा बिहानैदेखि नेपाली राष्ट्रगान बजिरहेको थियो। रोजगारीका लागि भारतका विभिन्न स्थानमा पुगेकाहरु बडादशैं मनाउन स्वदेश फर्किरहेका थिए।
सिमानाकामै पुगेर पर्यटन दिवसको अवसरमा आयोजना गरिएको कार्यक्रमले नेपाल घुम्न आएका विदेशी पर्यटकहरुलाई मात्र होइन भारतबाट घर फर्किरहेका नेपालीहरुको अनुहारमा पनि उल्लास छाइरहेको थियो।
शनिबार बेलहिया नाका हुँदै नेपाल प्रवेश गरेकी अस्ट्रेलियन पर्यटक बारबरा डोरा, नेदरल्याण्ड्सका मार्सल कैयवर र भारतीय पर्यटक डा. संजय सिंह र बिनोद मिश्रालाई ढाकाटोपी, दोसल्ला र गौतमबुद्धको मूर्ति दिएर स्वागत गरिएको हो।
उनीहरुलाई लुम्बिनी प्रदेश सरकारका प्रमुख सचिव बाबुराम अधिकारी र नाट्टा लुम्बिनीका अध्यक्ष चन्द्रबहादुर थापाले सम्मान गरेका हुन्।
सम्मानित भएपछि बोल्दै अस्ट्रेलियन पर्यटक डोराले नेपालजस्तो सुन्दर देश घुम्न आउँदा सीमा क्षेत्रमै पाएको सम्मानले अत्यन्तै खुसी भएको बताइन्।
‘मलाई नेपाल घुम्ने रहर थियो, त्यो रहर पूरा हुँदै गर्दा पाएको सम्मानले नेपाली र नेपालप्रतिको माया अझै बढेर गएको छ,’ डोराले भनिन्।
नेदरल्याण्ड्सका मार्सल कैयवरले पनि नेपाल प्रवेश गर्नासाथ आफूलाई गरिएको स्वागतले दंग परेको बताए।
‘म त आश्चर्यमा परेको छु, नेपाल प्रवेशद्वारमा यसरी सम्मान गरेपछि मलाई नेपालका गाउँठाउँमा झन कति स्वागत र सम्मान होला भन्ने कौतुहलता जागेको छ,’उनले भने।
कैयवरले अप्रत्याशित रुपमा सम्मान पाउँदा सबै नेपालीप्रति कृतज्ञता व्यक्त गरे। उनले नेपालीहरुको अतिथीहरुलाई गर्ने सत्कार संसारकै उदाहरणीय रहेको पनि बताए। भारतीय पर्यटकहरु सिंह र मिश्राले पाहुनाहरुलाई नेपालीहरुले गर्ने व्यवहार र सम्मान संसारले सिक्नुपर्ने बताए।
पर्यटकहरुलाई स्वागत गर्दै लुम्बिनी प्रदेशका प्रमुख सचिव बाबुराम अधिकारीले नेपालको आर्थिक समृद्धिको पहिलो आधार नै पर्यटन क्षेत्र रहेकोले पर्यटकहरुको स्वागत र उनिहरुको बसाई सहज बनाउने काममा सरकार र पर्यटन व्यवसायी मिलेर विशेष ध्यान दिनुपर्ने बताए।
नाट्टा लुम्बिनी प्रदेशका अध्यक्ष चन्द्र बहादुर थापाले आफुहरुले निस्वार्थ भावले नेपालको पर्यटनको विकासमा काम गरिहेको बताए।
‘हामी पर्यटन व्यवसायीहरु र सरकारी निकाय एकताबद्ध भई विदेशी पर्यटकको सहजताको लागि आ–आफ्नो क्षेत्रबाट सहकार्य गरि काम गर्नुपर्दछ,’ उनले भने।
कार्यक्रममा बौद्ध भिक्षु सुमंगलोले नेपालको धार्मिक, ऐतिहासीक, सांस्कृतिक र प्राकृतिक सम्पदाहरुले विदेशीलाई आकर्षित गरिरहेको बेला सबै नेपालीहरु समता भावको साथ एकताबद्ध भई पर्यटन प्रवर्द्धनमा लागेमा देश विकास हुने बताए।
सो अवसरमा पर्यटन व्यवसायी सागर अधिकारीले गुणस्तरीय पर्यटकको नेपाल बसाइँ लम्ब्याउन सकेमात्र नेपालको पर्यटन विकास हुने बताए।
नाट्टा लुम्बिनीले पछिल्ला केही वर्षयता विश्व पर्यटन दिवसको अवसरमा पर्यटकहरुलाई स्वागत र सम्मान गर्ने कार्यक्रम गर्दै आएको छ। सोही क्रममा यस वर्ष पनि नेपाल प्रवेश गर्ने पहिलो चारजना पर्यटकलाई सम्मान गरेको हो।
साथै सम्मानित चारैजना पर्यटकको पहिलो गन्तव्य सम्म एकदिनको यातायातको व्यवस्था र एक रातको होटल खर्चको व्यवस्थापन गरिदिएको छ। सम्मानपछि सिंह र मिश्रा शनिबार नै बुटवल हुँदै पाल्पातर्फ गएका छन् भने डोरा र कैयवर रुपन्देहीमै रोकिएका छन्।
नेपालमा हवाई मार्गबाट आउने विदेशी पर्यटकहरु त्रिभुवन विमानस्थल हुँदै आए पनि स्थलमार्गबाट आउने पर्यटकहरु भने पूर्वको पशुपतिनगरदेखि काकडभिट्टा, विराटनगर, बीरगन्ज, जनकपुर, कृष्णनगर, बेलहिया, नेपालगन्ज र पश्चिमको महेन्द्रनगरसम्मका नाकाबाट प्रवेश गर्छन्। तीमध्ये सबैभन्दा बढी पर्यटक बेलहिया नाकाबाट नेपाल प्रवेश गर्छन्।
बेलहिया नाका हुँदै सेप्टेम्बर २५ तारिखसम्म ५८ देशका ६३ हजार ७ सय ९३ जना पर्यटक नेपाल प्रवेश गरेका छन्। यो नाका हुँदै सबैभन्दा बढी श्रीलंकाका पर्यटक नेपाल प्रवेश गरेका छन्।
अध्यागमन कार्यालयले उपलब्ध गराएको तथ्यांकअनुसार श्रीलंकाका १९ हजार ८ सय ३५ जना, थाइल्याण्डका १२ हजार ३ सय ४५ जना, म्यानमारका ९ हजार २ सय ७८ जना, भियतनामबाट ४ हजार १ सय ८८ र दक्षिण कोरियाबाट २ हजार २४ जना पर्यटक बेलहिया हुँदै नेपाल भित्रिएका छन्।
नेपालमा सेप्टेम्बर महिनादेखिको समयलाई पर्यटनको सिजन मानिन्छ।
गर्मी र वर्षायाममा हुने बाढी पहिरो लगायतका प्राकृतिक विपत्तीका कारण यो समयमा पर्यटकहरु नेपाल आउने क्रम न्यून हुन्छ। असोजपछि वर्षायाम सकिने र गर्मी समेत हट्दै जाने भएकोले पर्यटकहरु नेपाल घुम्न आउने गर्छन्। त्यसैले सेप्टेम्बर पछिका महिना पर्यटनका लागि अनुकूल मानिन्छन्।
तर यस वर्ष भने जेनजी आन्दोलनका कारण नेपाल आउने विदेशी पर्यटकहरुको संख्या घटेको होटेल व्यवसायीहरु बताउँछन्।
नेपाल घुम्न आउने तयारीमा रहेका विदेशी पर्यटकहरु पनि ट्राभल्स र होटलमा गरेका बुकिङहरु धमाधम रद्ध गरिरहेको उनिहरुको दाबी छ।
लुम्बिनी होटल संघका महासचिव पूरुषोत्तम अर्यालले सेप्टेम्बर महिनामा लुम्बिनीका होटलमा गरिएको ९० प्रतिशत बुकिङ रद्द भएको बताए। जेन जी आन्दोलनको नाममा भएको आगजनी, तोडफोड र लुटपाटपछि पर्यटकहरुले असुरक्षित महशुस भएको भन्दै त्यसअघि नै बुकिङ गरेका होटलहरु रद्ध गरिरहेको पर्यटन व्यवसायीहरु बताउँछन्।
जेनजी आन्दोलनको क्रममा रुपन्देहीका आधा दर्जन बढि होटेल तथा रिसोर्टहरुमा आगजनी, तोडफोड र लुटपाट भएको थियो। होटेल र रिसोर्टहरुमा भएको आगजनी, तोडफोड र लुटपाटपछि पर्यटकहरुले असुरक्षित महशुश गरी बुकिङ रद्ध गरेको होटल व्यवसायीहरुको गुनासो छ।
त्यस्तै आन्दोलनको क्रममा नेपालका विभिन्न जिल्लामा रहेका कारागारबाट फरार रहेका झण्डै सात हजार कैदीबन्दी अहिलेपनि कारागार फर्किएका छैनन्। त्यसले पनि पर्यटकहरुमा सुरक्षा चुनौती बढाएको छ।
-1746009348.jpg)
