होक्काइदो समूहले नेपालमा सात वटा रेस्टुरेन्ट खोलेको छ।
नेपालमा जापानी परिकार पस्किने उद्देश्यले होक्काइदो नेपाल बिजनेस ग्रुप (एचएनबिजी) ले यी रेस्टुरेन्ट खोलेको हो।
एचएनबिजीले सबभन्दा पहिले सन् २०१९ मा पहिलो रेस्टुरेन्ट खोलेको थियो। सन् २०२५ सम्म आइपुग्दा 'होक्काइदो हाउस', 'इजाकाया होक्काइदो', 'होक्काइदो बेन्टो हाउस', 'याकितोरी', 'ओमाकासे', 'याकितोरी' र 'देक्काइदो एग्रो फार्म' गरी सात वटा रेस्टुरेन्ट खोलिसकेको समूहका निर्देशक खेम शर्माले बताए।
यी रेस्टुरेन्ट काठमाडौंको बुढानीलकण्ठ, बौद्ध, नक्साल, लाजिम्पाटमा, ललितपुरको सानेपामा र भैरहवामा छन्।
यो समूहका संस्थापक जापानको होक्काइदोमा बसेर आएका हुन्। त्यसैले रेस्टुरेन्टका नामहरू जापानी भाषामै राखिएको उनले बताए।
शर्माका अनुसार वर्ल्ड कल्चर हेरिटेजले विश्वकै स्वस्थकर खानाको सूचीमा जापानी खानालाई राखेको छ। त्यही कारण उनीहरूले यसमा लगानी गरेका हुन्।
जापानी खानामा पनि विशेषगरी रामेन, सुसी, बेन्टो बक्स, प्राउन टेम्पुरा लगायत ग्राहकको रोजाइमा परेको उनले बताए।
'पारिवारिक वातावरणमा स्वस्थवर्द्धक खाना पाइनु यहाँको मुख्य विशेषता हो,' उनले भने, 'हरेक रेस्टुरेन्टको विशेषता फरक छ।'
कुनैमा नेपाली, इन्डियन र जापानी परिकार पाइन्छ भने कुनैमा ७० प्रतिशत जापानी परिकार छ। बाँकी परिकार रेस्टुरेन्ट भएको स्थानका आधारमा समूहका एक्जुकेटिभ सेफले तय गर्छन्।
जापानी खानेकुरा भने सबै रेस्टुरेन्टमा एकै परिकार हुन्छ। मूल्य पनि सबैमा एउटै छ।
होक्काइदोका रेस्टुरेन्ट खाने ठाउँ मात्र भने होइन। यहाँ कार्यशाला, सेमिनार, बैठकहरू गर्ने ठाउँ छ। जन्मदिन, वर्षगाँठ लगायत उत्सव मनाउन, पारिवारिक वा साथीसंगाती जमघट गर्न पनि सकिन्छ।
होक्काइदो समूहमा सुरूमा दुई जना मात्र लगानीकर्ता थिए। रेस्टुरेन्ट संख्या बढेसँगै लगानीकर्ता थपिए। हाल यो समूहमा आठ जनाको लगानी छ।
'साढे दुई करोड रूपैयाँ लगानीमा व्यवसाय सुरू गरिएको थियो। हाल सबैमा गरेर १८ करोड रूपैयाँ पुगिसक्यो,' शर्माले भने।
यी रेस्टुरेन्टमा एक सय ७० जनाले रोजगारी पाएका छन्। यीमध्ये भान्सामा प्रत्यक्ष काम गर्ने ५५ जना हुन्। बाँकी प्रशासन तथा व्यवस्थापनमा छन्।
समूहले सन् २०२२ मा आफ्नै डिपार्टमेन्ट स्टोर पनि खोलेको छ। सबै रेस्टुरेन्टमा एकै खालको स्वाद दिने उद्देश्यले यो स्टोर खोलिएको हो।
'भनेका बेला चाहिएको सामान नपाएपछि हामीले आफै स्टोर खोलेका हौं,' उनले भने, 'अन्य जापानी रेस्टुरेन्टलाई पनि सामान दिन्छौं।'
स्टोरमा जापानी सस, चामल, सामन, मदिरा लगायत सामान पाइन्छ। तरकारी र फलफूल भने स्वदेशी नै प्रयोग हुन्छ। आयात गरिरहेको सामग्री पनि भविष्य यहीँ उत्पादन गर्नेबारे अध्ययन भइरहेको उनले बताए। सोही अनुसार भैरहवामा ६ बिघा जग्गा भाडामा लिएर फलफूल, तरकारी, माछा लगायत उत्पादन सुरू गरिएको छ।
होक्काइदो समूह आगामी वैशाखसम्म काठमाडौंमा थप दुइटा रेस्टुरेन्ट खोल्ने तयारीमा छ।
ठूलो लगानी भए पनि हाल समूह नाफा उन्मुख नभइसकेको अध्यक्ष शर्माले बताए।
'हामीले कोरोनाको समयमा काम सुरू गरेका हौं। त्यसैले अहिले लगानीकै चरणमा छौं। नाफामा जान पर्यटन फस्टाउनुपर्छ,' उनले भने।
-1740673001.jpg)
