ब्रिटिस एजुकेशन ग्रुप अन्तर्गतको द ब्रिटिस कलेज (टिबिसी) र थाइल्याण्डको कृक विश्वविद्यालयबीच समझदारीपत्रमा हस्ताक्षर भएको छ।
अन्तर्राष्ट्रिय शैक्षिक सहकार्यलाई निरन्तरता दिँदै ब्रिटिस कलेजले थाइल्याण्डको बैंककस्थित कृक विश्वविद्यालयसँग अनुसन्धान, शैक्षिक आदानप्रदान, तथा संस्थागत विकासमा दीर्घकालीन सहकार्य गर्ने जस्ता महत्वपूर्ण शैक्षिक क्रियाकलापहरूलाई अघि बढाउने विषयमा समझदारी गरेको हो।
समझदारी पत्रमा द ब्रिटिस कलेजको तर्फबाट कार्यकारी निर्देशक महेन्द्रराज कँडेल तथा कृक विश्वविद्यालयको तर्फबाट अन्तर्राष्ट्रिय विभाग निर्देशक डा. चनिदापा नुनुआलभुटिवोङले हस्ताक्षर गरे।
कार्यक्रममा टिबिसी इन्क्युबेसन सेन्टर प्रमुख गणेश पौडेल तथा कृकको दक्षिण एसियाका लागि मार्केटिङ प्रमुख धिरजकुमार शाक्यको पनि उपस्थिति रहेको थियो ।
सम्झौतापछि प्रतिक्रिया दिँदै ब्रिटिस कलेजका कार्यकारी निर्देशक कँडेलले भने, 'आगामी पाँच वर्षका लागि मान्य हुने यो समझदारीले दुवै संस्थाबीच संयुक्त अनुसन्धान कार्यक्रम, विद्यार्थी र फ्याकल्टी एक्सचेन्ज, संयुक्त रुपमा शैक्षिक कार्यक्रमको आयोजना गर्ने तथा अन्तर्राष्ट्रिय अनुसन्धान अनुदानका लागि संयुक्त आवेदन दिने लगायतको क्षेत्रमा काम गर्ने ढोका खोलेको छ।'
दुवै संस्थाले वैश्विक स्तरमा गुणस्तरीय शिक्षालाई प्रवर्द्धनन गर्ने साझा प्रतिबद्धता व्यक्त गरेका छन्।
साथै, यो समझदारीलाई भविष्यमा आपसी समझदारीका आधारमा नविकरण र विस्तार गर्न सकिने द ब्रिटिस कलेजले जानकारी दिएको छ।
