चीनद्वारा दुइटा विमान नेपाललाई हस्तान्तरण

चीन सरकारको सहुलियत ऋणमा ल्याइएका दुई वाई १२ विमान मंगलबार त्रिभुवन अन्तर्राष्ट्रिय विमानस्थलमा नेपाल सरकारलाई हस्तान्तरणपछि संस्कृति, पर्यटन तथा नागरिक उड्डयनमन्त्री रवीन्द्र अधिकारी, नेपालका लागि चीनका राजदूत यू होङलगायत । तस्वीर : रासस


चीन सरकारको सहुलियत ऋणमा उपलब्ध गराएको दुई वटा विमान नेपाल वायु सेवा निगमलाई हस्तान्तरण गरिएको छ।

त्रिभुवन अन्तर्राष्ट्रिय विमानस्थलमा मंगलबार एक कार्यक्रमका बीच संस्कृति, पर्यटन तथा नागरिक उड्डयनमन्त्री रवीन्द्र अधिकारी र नेपालका लागि चिनियाँ राजदूत यू होङले विमानको संयुक्त उद्घाटन गरे।

कलसाइन 9N–AKU र 9N-AKV विमान करिब डेढ महिनाअघि काठमाडौं ल्याइएको थियो। यो विमानको यात्रु क्षमता १७ सिट छ। यी २ सहित ६ वटा चिनियाँ विमान नेपाल आइसकेका छन्। ६ विमानमध्ये दुई विमान वाई १२ र एमए ६० (५६ सिट क्षमताका) विमान चीनको अनुदानमा ल्याइएको हो भने बाँकी एक एमए ६० र तीन वाई १२ गरी ४ विमान सहुलियत ऋणमा खरिद गरिएको निगमले जनाएको छ।

विसं २०६९ सालमा नेपाल सरकार र चीन सरकारबीचको प्रत्यक्ष सम्झौता बमोजिम कूल ६ वटा जहाज नेपाल वायुसेवा निगमले ल्याउने र त्यसमा दुईवटा अनुदान र ४ वटा सहुलियत ऋणमा ल्याउने सहमति भएको थियो।

चीन सरकारले बाँकी २ वटा विमान पनि हस्तान्तरण गरेपछि नेपालको आन्तरिक उडानले फड्को मार्ने आशा पलाएको निगमका महाप्रबन्धक सुगतरत्न कंसाकारले बताए। उनले विमानको मर्मत, संहारका विषयमा पनि चिनियाँ कम्पनीसँग कुरा भइरहेको पनि जानकारी दिए। निगमले यी २ वटा विमान तराई क्षेत्रमा सञ्चालन गर्ने योजना पनि बनाएको छ।

निगमका पुराना तीनसहित नौ वटा विमान आन्तरिक उडानका लागि छन् भने अन्तर्राष्ट्रियतर्फ एक बोइङ र दुई एयरबस ए–३२० बाट उडान भर्दै आएको छ। हाल निगमले देशका विभिन्न २० गन्तव्यमा आन्तरिक तथा अन्तर्राष्ट्रियतर्फ विभिन्न मुलुकका ८ वटा गन्तव्यमा नियमित उडान भर्दै आएको छ। निगममा विमान भित्रिए पनि विमानचालक –पाइलट अभावका कारण तीन वटा विमान लामो समयदेखि थन्किएका छन्।

Share:

© 2017 Setopati Sanchar Pvt. Ltd.