काठमाडौं उपत्यका तथा देशका विभिन्न स्थानमा विद्युत अवरूद्ध भएको छ। कतिपय स्थानमा झ्याप्प-झ्याप्प लाइन आउने जाने क्रम जारी छ।
योसँगै कतिपयले लोडसेडिङ सुरू भएको हो कि भन्दै गुनासो पोखिरहेका छन्।
के कारण बिजुली गयो भनेर हामीले नेपाल विद्युत प्राधिकरणका प्रवक्ता राजाभाइ शिल्पकारसँग कुराकानी गरेका छौं।
उनका अनुसार अन्तरदेशीय ढल्केवर–मुजफ्फपुर प्रसारण लाइनमा प्राविधिक समस्या आउँदा देशका अधिकांश क्षेत्रमा विद्युत् आपूर्ति प्रभावित भएको हो।
'मुख्य लाइनमै समस्या आयो। यसले गर्दा देशका धेरै ठाउँमा बिजुली गएको छ। खासमा भारततर्फ समस्या आएको हो। सर्ट भएको भनौं न। जसरी एउटै लाइनबाट दुइटा घरमा बिजुली जोडेको बेला एउटामा सर्ट भयो भने अर्को घरको पनि बिजुली जान्छ। अहिले त्यस्तै भएको हो,' उनले सेतोपाटीसँग भने।
समस्या समाधान गरेर बिजुली आपूर्ति सुरू गरिएको र कतिपय ठाउँमा समस्या समाधान भइसकेको पनि उनले बताए।
केही समयमा सबै क्षेत्रको समस्या समाधान हुने गरी काम भइरहेको पनि उनले जानकारी दिए।
-1747318315.jpg)
