नेपाल विद्युत प्राधिकरणले समयमा ऋणको सावाँ ब्याज भुक्तानी गर्न नसकेको देखिएको छ।
महालेखा परीक्षकको कार्यालयले विद्युत प्राधिकरणसँग एक खर्ब २४ अर्ब रूपैयाँभन्दा बढी बक्यौता बाँकी रहेको देखाएको छ।
नेपाल सरकारले सार्वजनिक संस्थान, समिति, बोर्ड, कोष र स्थानीय तहमा गरेको ऋण लगानीको भाका नाघेको सावाँ ब्याज १ खर्ब ८१ अर्ब १८ करोड रहेको उल्लेख गरिएको छ।
'भाका नाघेको ऋणको सावाँ र ब्याजमध्ये नेपाल विद्युत प्राधिकरणको १ खर्ब २४ अर्ब ४ करोड रहेको छ...' महालेखाको प्रतिवेदनमा उल्लेख गरिएको छ।
यस्तै हाल सञ्चालनमा नरहेका १४ संस्थानको १ अर्ब २२ करोड ५० लाख सावाँ तथा ५ संस्थानको २४ करोड ६४ लाख ब्याजको भाका नाघेको छ।
यसैगरी १२ स्थानीय तहमा १ अर्ब १८ करोड ६२ लाख ऋण लगानी गरेकोमा सावाँ १ अर्ब १८ करोड ३० लाख र ब्याज १ अर्ब ७७ करोड ३८ लाखको भाका नाघेको छ।
भाका नाघेको सावाँ र ब्याज रकम तथा राजस्व बक्यौता लगायतका रकमहरू कानुनी प्रक्रियाबमोजिम असुल गर्न महालेखाले सुझाएको छ।
