मेलम्ची खानेपानीको पाइप फुट्दा भत्किएको बाटो सडक डिभिजन काठमाडौंले नै बनाउने भएको छ।
काठमाडौं उपत्यका खानेपानी लिमिटेड (केयुकेएल), विद्युत प्राधिकरण र सडक डिभिजनको शुक्रबार बिहान १० बजे त्रिपक्षीय बैठक बसेको थियो।
बैठकमा मेलम्ची खानेपानीको पाइप फुट्दा भएको क्षतिको आकलन गरी लागत स्टिमेट तयार पार्ने र शुक्रबारबाटै काम थाल्ने गरी निर्णय भएको सडक डिभिजन काठमाडौंका प्रमुख नारायणदत्त भण्डारीले जानकारी दिए।
सडक बनाउँदा लागेको खर्च भने केयुकेएल र विद्युत् प्राधिकरणले नै व्यहोर्ने गरी सहमति भएको डिभिजन प्रमुख भण्डारीले जानकारी दिए।
‘मैले बिहीबार नै केयुकेएलका प्रमुख कार्यकारी अधिकृतलाई फोन गरेर पानी वितरण सुरू भएकाले अब सडक पनि बनाउन भनेको थिएँ। उहाँले विद्युत प्राधिकरणले भत्काएकाले बनाउने दायित्व उसैको भएको बताउनुभयो,’ भण्डारीले सेतोपाटीसँग भने, ‘त्यसपछि मैले विद्युत प्राधिकरणलाई पनि फोन गरेर सडक बनाउन ताकेता गरेको थिएँ।’
प्राधिकरणले ठेकेदारलाई देखाएको र ठेकेदारले प्राविधिक र जनशक्ति नभएको भन्दै तत्काल सम्भावना नरहेको भनेपछि बनाउँदा लाग्ने खर्च व्यहोर्ने हो भने सडक डिभिजन आफैले काम सुरू गर्ने बताएपछि त्यसैमा सहमति जुटेको भण्डारीले बताए।
सहमतिअनुसार अहिले तीनै पक्ष अवलोकनका लागि बबरमहल क्षेत्रमा गएको र आजैबाट काम सुरू गर्ने तयारी रहेको भण्डारीले बताए।
उनकाअनुसार बुधबार मेलम्चीको पाइप फुट्दा सडकतर्फ करिब २५ देखि ३० लाखको क्षति भएको छ।
उनले करिब १५ दिनसम्ममा उक्त सडक खण्ड बनाइसक्ने पनि जानकारी दिए।
‘हामी दुई दिनभित्रै बनाउने गरी जनशक्ति विन्यास पनि गर्न सक्छौं। तर बेस राख्नुपर्ने र त्यो सुक्नुपर्ने भएकाले अलिकति समय लाग्ने देखिएको हो। हामी १० देखि १५ दिनभित्र भत्किएको सडक मर्मत गरेर कालोपत्र गरिसक्छौं,’ उनले भने।
बुधबार विद्युत प्राधिकरणले तार भूमिगत गर्न सडक प्वाल पार्दा थोक वितरणतर्फको पाँच सय एमएमको पाइपमा क्षति पुगेको थियो। ड्रिलिङ उपकरणले पाइप प्वाल पारेपछि सडकमा खोला नै बगेको थियो। काठमाडौं उपत्यका खानेपानी लिमिटेडले बिहीबार नै पाइप फेरेर पानी वितरण नियमित बनाइसकेको छ।
माइतीघर– तीनकुने खण्डमा काठमाडौं महानगरपालिका र विद्युत प्राधिकरणले सडक डिभिजन काठमाडौंसँग अनुमति लिएर मंसिरदेखि तार भूमिगत, फुटपाथ बनाउने काम गरिरहेका थिए।
-ink-1739436459.jpeg)
