सडक डिभिजन काठमाडौंले काठमाडौं उपत्यका खानेपानी लिमिटेड (केयुकेएल) को आयोजना कार्यान्वयन निर्देशनालयलाई पत्र लेखेर बबरमहल क्षेत्रको सडक तत्काल बनाउन भनेको छ।
बबरमहल क्षेत्रमा मेलम्ची खानेपानीको थोक वितरणतर्फको पाइप बुधबार दिउँसो फुट्दा सडकमा क्षति पुगेको थियो।
सडकमा खोला नै बगेर बबरमहल क्षेत्रमा रहेका सरकारी तथा निजी आवाससमेत डुबानमा परेका थिए। जिल्ला अदालतको सुनुवाइ नै प्रभावित भएको थियो।
अहिले केयुकेएलले फुटेको पाइप फेरेर पानी परीक्षण गरिरहेको छ तर सडकको आवागमन भने प्रभावित नै छ। केयुकेएलले बुधबार रातिदेखि नै काम थालेर बिहीबार साँझबाट पानी नियमित पठाउने दाबी गरिरहेको छ।
बिहीबार आयोजना कार्यान्वयन निर्देशनालय (पिआइडी) लाई पत्र पठाएर क्षतिग्रस्त सडक यथास्थितिमा यथाशिघ्र पुनस्थापना गरिदिन भनेको सडक डिभिजन काठमाडौंका प्रमुख नारायणदत्त भण्डारीले जानकारी दिए।
‘सडक डिभिजन काठमाडौंअन्तर्गत अरनिको राजमार्गको माइतीघर तीनकुने सडक खण्डको बबरमहलस्थित सर्भिस लेनमा बिछ्याइएको पाइप माघ ३० मा फुट्न गई सडकमा क्षति पुग्न गएको विदितै छ,’ भण्डारीले पिआइडीलाई लेखेको पत्र उद्धृत गर्दै भने, ‘उक्त सडकखण्ड यातायात सञ्चालनको दृष्टिले अति संवेदनशील क्षेत्र हो। उक्त क्षतिग्रस्त सडक यथास्थितिमा यथाशिघ्र पुनर्स्थापना गरिदिन हुन अनुरोध छ।’
बबरमहल क्षेत्रको घटनाको प्रवृत्ति हेर्दा आगामी दिनमा अन्यत्र पनि पाइप फुट्नसक्नेतर्फ आफूले सचेत गराएको भण्डारीले बताए।
‘पाइप फुटेर जलमग्न हुन थालेपछि पाइपको इनलेट बन्द गर्न खबर गराए पनि लामो समयसम्म पानीको बहाव नरोकिएको भण्डारीले बताए। त्यसले थप क्षति हुन पुगेको पनि उनले बताए।
‘तसर्थ यस किसिमको क्षतिको न्यूनीकरणको लागि थप आवश्यक सावधानी अपनाउन हुन समेत अनुरोध गरेका छौं,’ उनले भने।
सडक डिभिजन काठमाडौंले विद्युत प्राधिकरणलाई गत मंसिर २ गते उक्त खण्डमा तार बिछ्याउने स्वीकृति दिएको थियो। काठमाडौं महानगरपालिकाले पनि फुटपाथ बनाउन सडक डिभिजनसँग अनुमति मागेकाले केही समय रोकेर दुवैलाई एकैसाथ स्वीकृति दिएको भण्डारीले बताए।
भत्काएको सडक, पेटी मर्मत नभएसम्म दुर्घटना हुन नदिन सुरक्षाका उचित उपाय अवलम्बन गर्नुपर्ने तथा दुर्घटना भएमा सोको जबाफदेही ती निकाय नै हुने गरी अनुमति दिएको डिभिजन प्रमुख भण्डारीले बताए।
सडक डिभिजन काठमाडौंले माइतीघर, नयाँ बानेश्वर, तीनकुने खण्डको ५ हजार २४४ मिटर लम्बाइको सण्डमा तार भूमिगत गर्न र फुटपाथ बनाउनअनुमति दिएको थियो।
‘बबरमहलमा फुटेको पाइप फेरेर परीक्षण भइरहेको छ, बेलुकैबाट पानी आपूर्ति सुरू हुन्छ’
केयुकेएलले बबरमहल क्षेत्रको चुहावट मर्मत भइसकेको जनाएको छ।
केयुकेएलका प्रमुख कार्यकारी अधिकृत (सिइओ) अशोककुमार पौडेलले बबरमहल क्षेत्रमा फुटेको पाइप फेरेर अहिले पानी परीक्षण भइरहेको र बिहीबार रातिदेखि नै आपूर्ति सुरू हुने बताए।
‘हामीले त्यहाँको फुटेको पाइप मर्मत गरिसकेका छौं। अहिले पानी परीक्षण भइरहेको छ। आजै रातिबाट आपूर्ति नियमित हुन्छ,’ सिइओ पौडेलले सेतोपाटीसँग भने।
उनकाअनुसार बुधबार रातिदेखि नै पाइप मर्मतको काम सुरू गरिएको उनले बताए। केयुकेएलका सिइओ पौडेलले क्षतिको आकलन भइनसकेको बताएका छन्।
‘काठमाडौंको मुख्य स्थानको खानेपानी वितरण र सडकको आवागमन नै प्रभावित भएपछि हाम्रा संरचनाको मर्मतमै ध्यान केन्द्रित गर्यौं। २४ घन्टाभित्रैमा मर्मत गरेर पानी परीक्षण गरिरहेका छौं,’ उनले भने।
केयुकेएलले विद्युत प्राधिकरणको लापरवाहीका कारण बबरमहल क्षेत्रमा थोक वितरणतर्फको पाइपमा क्षति पुगेको बताएको छ।
प्राधिकरणले त्यहाँ तार भूमिगत गर्न ड्रिल (सडक प्वाल पारेर तार बिछ्याउने) काम गरिरहेको छ। सडक ड्रिल गर्दा पाइप प्वाल परेकाले अचानक खोला बगेको केयुकेएलले बताएको छ।
-ink-1739436460.jpeg)
