भौतिक पूर्वाधार तथा यातायात मन्त्रालयले बर्दियाको जब्दिघाट पुल नयाँ ठेक्कामार्फत निर्माण अघि बढाइने भएको जनाएको छ।
मन्त्रालयमा बुधबार आयोजित पत्रकार सम्मेलनमा भौतिक पूर्वाधारमन्त्री प्रकाश ज्वालाले अर्थ मन्त्रालयसँग बजेटका लागि छलफल भएको र अबको दस दिनभित्र ठेक्का प्रक्रियाका लागि सूचना प्रकाशित गर्ने जानकारी दिए।
बर्दियाका स्थानीय जनप्रतिनिधि, सांसदलगायत सबैसँग सल्लाह गरेर सहमतिमा पुगेको उनको भनाइ छ।
पुराना पुलको अदालतमा मुद्दा भएको र त्यसको आसपास नयाँ ठाउँमा पुलको ठेक्कामा जान लागिएको उनले बताए।
'अर्थमन्त्रीसँग मन्त्रिपरिषद बैठकमा कुराकानी हुँदा अर्थले बजेट सुनिश्चित गर्नुपर्यो र प्राविधिक रूपमा गर्नुपर्ने काम विभागले गरिरहेको बताएको छु,' उनले भने।
मन्त्री ज्वालाले हाल अनसनमा बसिरहेका सांसद सञ्जय गौतमलाई अनसन तोड्न पनि अनुरोध गरेका छन्। अरू मन्त्रालयसँग सम्बन्धित विषय सम्बन्धित मन्त्रालय बोल्ने भए पनि आफ्नो मन्त्रालयले माग सम्बोधन गरेको उनको भनाइ छ।
जब्दिघाट पुल निर्माण गर्नुपर्ने लगायतका माग गर्दै बर्दियाका सांसद गौतक आमरण अनसन बसेका छन्। पप्पु कन्स्ट्रक्सनले निर्माण गरेको सो पुल पाँच वर्ष पहिले भत्केको थियो भने गत वर्षको बाढीले सबै संरचना बगाएको थियो।
विकासका काम छिटो सम्पन्न भएर नागरिकले छिटो सुविधा पाऊन् भन्ने कुरामा आफूले ध्यान दिइरहेको मन्त्री ज्वालाले बताए।
'क्रोनिक' ठेक्काका विषयमा सकेसम्म लचिलो भएर काम गराउन लागिएको उनले जानकारी दिए।
ऊर्जा, जलस्रोत तथा सिँचाइ मन्त्रालय, वन मन्त्रालय वा अन्य कुन मन्त्रालय वा निकायका कारण निर्माणमा अवरोध पुगेको हो सो निकायसँग अनुरोध गरेर वा दबाब दिएर कसरी हुन्छ काम गराउन लागिएको उनले बताए।
'कुनै पनि अवस्थामा काम नहुने र जनतालाई दुःख दिने र काम गर्नसक्ने अवस्था नभएमा मात्रै ठेक्का तोड्न लागिएको छ,' उनले भने।
त्यस्तै घोराहीको बबईदेखि तुलसीपुरसम्मको एक्जिम बैंकको सफ्ट लोनमा अघि बढेको सडक योजनाको ठेक्का तोडिएको उनले जानकारी दिए। सन् २०१९ मा दुई वर्षमा सकाउने गरी ठेक्का भए पनि अवधि थप्दासमेत १० प्रतिशतबाहेक प्रगति नभएकाले त्यो ठेक्का तोडिएको उनले बताए।
'त्यसपछि पनि निर्माण कम्पनीलाई पत्राचार र सम्पर्क गर्दा बेवास्ता गरेकाले ठेक्का तोडिएको थियो,' उनले भने।
मन्त्रालयका सहसचिव अर्जुनजंग थापाले गत आर्थिक वर्षमा कतिपय पुराना ठेक्का सम्पन्न भएका र नभएको योजनामा पुरानो ठेक्का तोडेर नयाँ प्रक्रियामार्फत निर्माण अघि बढाइरहेको बताए। सधैं निर्माण व्यवसायीको कारणले मात्रै नभएर कहिलेकहिले भौगोलिक लगायतका कारणले निर्माणमा समस्या आउने गरेको उनले बताए।
सडक विभागका महानिर्देशक सुशीलबाबु ढकालले यसअघि पनि जब्दिघाट पुलका विषयमा कुरा उठेको र कुन विकल्पमा जान सकिन्छ भनी छलफल भइरहेको बताए। अहिले आफू विभागका पुल महाशाखाका प्रतिनिधिसहित निर्माणस्थल पुगेर स्थानीयवासीसँग छलफल गरेर आएको उनले जानकारी दिए।
'स्थानीयवासीसँग अहिले पुल भएको ठाउँभन्दा केही यताउता बनाउने गरी कुरा भएको छ,' उनले भने।
