नेपालको पहिलो डिजिटल वालेट आइएमई पे र खल्तीबीच मर्जर हुने भएको छ।
मर्जरका लागि राष्ट्र बैंकले अन्तिम स्वीकृति दिएको छ।
नेपालको इतिहासमै दुई ठूला डिजिटल वालेट एक भएर एकीकृत कारोबार हुन लागेको यो नै पहिलो पटक हो।
आइएमई पे र खल्तीको एकीकृत कारोबार पश्चात आधिकारिक रूपमा कम्पनीको नाम भने आइएमई खल्ती लिमिटेड रहनेछ। यसको रजिस्टर्ड कार्यालय काठमाडौं, पानीपोखरीस्थित रहनेछ।
संयुक्त कारोबारपश्चात आधिकारिक रूपमा एपको नाम भने खल्ती रहनेछ। यससँगै ठूलो चुक्ता पुँजी र पचास लाखभन्दा बढी आधिकारिक प्रयोगकर्ताहरू हुने खल्ती एप नेपालकै सबभन्दा ठूलो र बलियो डिजिटल वालेटको रूपमा स्थापित हुने कम्पनीको दाबी छ।
यस मर्जरले नेपालको ग्रामीण क्षेत्रसम्म पनि भुक्तानी सेवा विस्तारमा तीव्रता आउने विश्वास कम्पनीले लिएको छ।
नेपाल राष्ट्र बैंकबाट एकीकृत कारोबारका लागि अन्तिम स्वीकृति पाएसँगै आगामी तीन महिनासम्म प्रयोगकर्ताहरूको समायोजन कार्य तीव्र रूपमा चल्ने कम्पनीले उल्लेख गरेको छ।
यो अवधिमा आइएमई पे र खल्ती दुवै एप यथावत् रूपमा सञ्चालनमा रहने छन्। दुवै वालेट प्रयोगकर्ताहरूको रकम र रोयल्टी प्वाइन्टहरू, खल्ती प्वाइन्ट र आईएमई पे रिवार्ड प्वाइन्टहरू पनि यो समयभित्र मर्जरपछि चल्ने खल्ती एपमै देखिन्छ।
आइएमई पे मा मात्र भएका प्रयोगकर्ताहरूले आफैले ट्याप गरेपछि खल्ती एपमा देखिनेछन्। नयाँ प्रयोगकर्ताको हकमा भने प्रयोगकर्ताले सिधै खल्ती एप डाउनलोड गरेर नयाँ फिचरमा प्रवेश गर्न सक्नेछन् र आइएमई पे एपको मात्र प्रयोग गरिरहेका प्रयोगकर्ताले पनि अब खल्ती एपबाट नै सेवा सुविधाको उपयोग गर्न सक्नेछन्।
संयुक्त कारोबार पश्चात एपको नाम खल्ती भए पनि आइएमई पेमा भएका सबै फिचरहरू त्यहाँ समावेश हुनेछन्।
अहिलेसम्म आइएमई पेमा रहेका ग्राहक पनि एक ट्यापमै खल्ती एपमा आबद्ध हुन सक्नेछन्।
आइएमई पेमा भएका ब्यालेन्स, रिवार्ड प्वाइन्ट सहजै खल्तीमा स्थानान्तरण हुनेछन्। यस कार्यबाट खल्ती एप सहज र सुविधाजनक डिजिटल प्लेटफर्मको रूपमा स्थापित हुने विश्वास लिइएको छ।
संयुक्त कारोबार पश्चात यो डिजिटल भुक्तानी प्रणाली आगामी दिनमा व्यापक रूपमा प्रयोग हुने मात्र नभई सबभन्दा विश्वासिलो भुक्तानी प्रणालीको रूपमा रहने कम्पनीको विश्वास छ।
डिजिटल भुक्तानी विस्तारै दैनिक जीवनको एक हिस्सा बन्दै गरेको वर्तमान समयमा आइएमई पे र खल्ती बीचको संयुक्त कारोबार नेपालको डिजिटल क्षेत्रमा कोशेढुंगा सावित हुने कम्पनीको विश्वास छ।
खल्ती वालेटले आगामी दिनहरूमा प्रयोगकर्ताहरूलाई फिनटेक क्षेत्रमा नयाँ अनुभव प्रदान गर्नेछ।
एपमार्फत् प्रयोगकर्ताहरूले विश्वको कुनै पनि ठाउँबाट पठाएको रेमिटेन्स सजिलै वालेटमा प्राप्त गर्न सक्नेछन् भने एपमार्फत् नै बैंक खाता खोल्न, भिजा कार्ड प्राप्त गर्न सक्नेछन् साथै भविष्यमा ऋण तथा अन्य सुविधाको पहुँच विस्तार पनि खल्ती एप मै हुनेछ ।
