सामाजिक सञ्जालहरूमध्ये फेसबुकबाट धेरै साइबर अपराधका घटना भएको भन्दै दर्ता हुने गरेको पाइएको छ।
साइबर ब्युरोको तथ्यांक अनुसार दर्ता भएका घटनामध्ये सामाजिक सञ्जालहरूमा फेसबुकबाट मात्रै करिब ८५ प्रतिशत घटना दर्ता हुने गरेको ब्युरोकी इन्स्पेक्टर दिपा भट्टराईले भनिन्।
नेपाल दूरसञ्चार प्राधिकरण, राष्ट्रिय बाल अधिकार परिषद्, महिला, बालबालिका तथा जेष्ठ नागरिक मन्त्रालय र सञ्चार तथा सूचना प्रविधि मन्त्रालयले आयोजना गरेको 'सुरक्षित इन्टरनेट दिवसको अवसर २०२५' मा उनले यस्तो जानकारी गराएकी हुन्।
ब्युरोको तथ्यांक अनुसार आर्थिक वर्ष २०८०/८१ मा १९ हजार सात सय ३० वटा अपराधका घटना दर्ता भएकोमा फेसबुकबाट भएको भन्दै आएका उजुरीको संख्या मात्रै १६ हजार ९६ थियो।
त्यस्तै, चालु आर्थिक वर्षमा हालसम्म फेसबुकबाट अपराध भएको भन्दै पाँच हजार पाँच सय ७० वटा उजुरी दर्ता भएको छ। यो अवधिमा कुल १० हजार सात सय दुई वटा उजुरी परेकोमा ५३ वटाको मुद्दा दर्ता भएको छ।
नेपालमा इन्टरनेटमार्फत् साइबर बुलिङ, बाल यौन दुरव्यवहार, पोर्न रिभेन्ज, बैंक एकाउन्ट ह्याक, अपमानजनक कार्य गर्ने लगायतका अपराध भइरहेका छन्।
धेरैजसो साइबर अपराधमा आफ्नै नजिकका साथीभाइ, शिक्षक, पारिवारीक सदस्य, छिमेकी लगायत हुने गरेका छन् भने वित्तीय अपराध मुलुक बाहिरबाट समेत भइरहेको छ।
'बदलाभावले श्रीमानले नै श्रीमतीको नग्न तस्बिर सार्वजनिक गरिदिने जस्ता कार्यसमेत हुने गरेका छन्,' भट्टराईले भनिन्।
त्यस्तै, इन्टरनेटमा धेरै समय बिताउने पछिल्लो पुस्ताले धेरैजसो वित्तीय अपराधको सामना गर्न परिरहेको समेत उनले बताइन्।
यो आर्थिक वर्षमा मात्रै यस्तो वित्तीय अपराधका घटानामा ब्युरोले चार करोड ५० लाख बराबर रकम पीडितलाई फिर्ता गराउन सफल भएको समेत उनले बताइन्।
