सूचना तथा सञ्चार प्रविधिको सबैभन्दा ठूलो प्रदर्शनी 'एचएमसी नेपाल हिक्सेमी क्यान इन्फोटेक २०२५' मा दुई लाखभन्दा बढीले अवलोकन गरेको आयोजकले जनाएको छ।
एसोसिएसन नेपाल महासंघ (क्यान महासंघ) द्वारा आयोजित यो ३०औं संस्करण माघ २४ देखि २८ गतेसम्म राजधानीको भृकुटीमण्डपमा आयोजना गरिएको थियो।
सूचना प्रविधिका विश्वस्तरीय ब्रान्ड, दूरसञ्चार तथा इन्टरनेट सेवा प्रदायक, फिनटेक, ई–कमर्स, साइबर सुरक्षा समाधान, ब्लकचेन प्रविधि, एआई तथा डिजिटल साक्षरताका नयाँ पहलहरू मेलाको मुख्य आकर्षण रहेका थिए।
नेपाली स्टार्टअप तथा नव प्रवर्तनकर्ताहरूका सफ्टवेयर, एप्लिकेसन तथा स्वदेशी प्रविधिहरूमा चासो देखाएको आयोजकले जनाएको छ।
प्रदर्शनीमा मसिन लर्निङमा आधारित एआई टुल, स्वदेशी सफ्टवेयर, सेल्फ–ड्राइभिङ कार प्रविधि जस्ता परियोजनाहरूले उल्लेख्य ध्यान तानेको बताइएको छ।
सहभागी विज्ञ तथा सरोकारवालाहरूले नेपाली एआई प्रविधिलाई अन्तर्राष्ट्रियस्तरमा पुर्याउने आवश्यकता औंल्याए थिए।
क्यान महासंघकी अध्यक्ष सुनैना घिमिरे पाण्डेले सूचना प्रविधिको विकासका लागि सरकारसँग सहकार्य गर्दै नीति निर्माणमा सक्रिय रहने प्रतिबद्धता जनाइन्।
महासंघले डेटा प्रोटेक्सन ऐन, राइड सेयरिङ नीति, एआई प्रविधिका लागि आवश्यक डेटा व्यवस्थापन तथा वैदेशिक लगानी ऐनमा सुधार गर्न पहल गरिरहेको उनले बताइन्।
यस वर्षको क्यान इन्फोटेकमा १५५ स्टल सहभागी थिए। कम्पनीहरूले उपभोक्तासँग अन्तर्क्रिया, प्रविधि परीक्षण तथा विभिन्न छुट योजनामार्फत प्रवर्द्धन गरे।
प्रदर्शनीको अन्तिम दिनसम्म उपभोक्ताले ३० देखि ७० प्रतिशतसम्म छुट र विशेष अफरहरू दिइएको थियो।
क्यान महासंघका महासचिव चन्द्र विलास भुर्तेलका अनुसार यो संस्करणले नेपाली नवप्रवर्तन तथा सूचना प्रविधिको विकासमा नयाँ ऊर्जा थपेको छ।
आगामी संस्करणलाई अझ प्रभावकारी बनाउन प्रविधि शिक्षामा जोड दिने, डिजिटल साक्षरता अभिवृद्धि गर्ने तथा नीतिगत सुधारका लागि पहल गर्ने योजना बनाएको महासंघले जनाएको छ।
