सरकारले सिमेन्टमा लगाउने अन्तशुल्कको शैली परिवर्तन गरेर बढाएको छ।
अब उत्पादन मूल्यको आधारमा सिमेन्टमा प्रतिबोरा ५ प्रतिशत अन्तशुल्क लिने भएको हो।
यस अघिसम्म सरकारले प्रतिबोरा ११ रूपैयाँ अन्तशुल्क लगाउँदै आएको थियो।
५ प्रतिशत अन्तशुल्क लगाएसँगै सिमेन्टको लागत मूल्य बढ्ने व्यवसायीहरूले बताएका छन्।
अर्घाखाँची सिमेन्टका सञ्चालक पुशपति मुरारकाले सिमेन्टको भाउ बोरामा १५ देखि २५ रूपैयाँसम्म बढ्न सक्ने बताए।
उनले सरकारले लिएको बजेटबाट सिमेन्टको माग बढ्नुका साथै रियल-इस्टेट क्षेत्र चलायमान बनाउन ठुलो योगदान पुग्ने पनि बताए।
'बजेटमा सबैभन्दा राम्रो लागेको कार्यक्रम कर्मचारीका लागि एक लाख अपार्टमेन्ट बनाउने कार्यक्रम हो,' मुरारकाले भने, 'साच्चिँकै यो कार्यक्रम कार्यान्वयन गरियो भने रियल-इस्टेट क्षेत्र चलायमान हुनेछ।'
नेपाल उद्योग वाणिज्य महासंघका पूर्वअध्यक्ष समेत रहेका मुरारकाले बजेट सन्तुलित र निजी क्षेत्रमैत्री भएको बताए।
