टर्किस भाषामा 'अलेभ' को अर्थ आगोको राप हो। त्यही आगोको रापमा सेकाउँदै पकाएको मासुलाई 'केबाप' भनिन्छ। यसलाई अरबी र अन्य राष्ट्रहरूमा कबाब भनेर चिनिन्छ।
मासुको किमालाई सुरूमा विशेष मसलासँग मोलिन्छ। अनि फलामे सिन्कामा मासु च्याप्प टाँसेर आगोको रापमा पकाएपछि कबाब तयार हुन्छ।
यस्तो कबाब खान टर्की वा अरबी देश पुग्न भने पर्दैन। काठमाडौंको टंगालस्थित 'अलेभ कबाब सल्टनेट' ले टर्कीका विशेष परिकारहरू पस्किँदै आएको छ।
टंगाल मन्दिरबाट गहनापोखरी जाने बाटोको बायाँतर्फ छ अलेभ कबाब। हेर्दै विलासी देखिने यो रेस्टुरेन्टमा टर्कीका परिकारसँगै मध्य-पूर्वी परिकार पनि पाइन्छ। यहाँको खास विशेषता कबाब नै भएकाले 'अलेभ कबाब सल्टनेट' नाम राखिएको रेस्टुरेन्टका सह-सञ्चालक प्रकाश कटवालले बताए।
'टर्किस भाषामा सल्टनेट भन्नाले घर बुझाउँछ। कबाब टर्की खानामध्ये प्रख्यात भइहाल्यो,' उनले भने।
३७ वर्षीय प्रकाश अलेभ कबाबका सह-सञ्चालकसँगै एक्जुकेटिभ सेफ समेत हुन्। प्रकाशकै नेतृत्वमा रेस्टुरेन्टको भान्सादेखि ग्राहक सत्कार र व्यवस्थापन चलिरहेको छ। उनी रेस्टुरेन्ट ग्राहक केन्द्रित हुनुपर्ने मान्यतामा विश्वास राख्छन्।
'रेस्टुरेन्ट भनेकै ग्राहक सेवाका लागि हो। अलेभमा खानाको स्वादसँगै बस्ने वातावरण र सत्कारसम्मका विषयलाई प्राथमिकतामा राखेका छौं,' प्रकाशले भने।
अलेभमा ग्राहक सत्कारका लागि उपस्थित कर्मचारी मात्रै होइन, सेफ आफैं उनीहरूको टेबलसम्म पुग्ने प्रकाश बताउँछन्। उनीहरू ग्राहकलाई खानाबारे बताउँछन्। खाने तरिका सिकाउँछन्। खाना पस्किदिन्छन्। अन्तिममा प्रतिक्रिया पनि बटुल्छन्। हाल अलेभमा ३० जना कर्मचारी छन्।
अलेभको सञ्चालन एवम् व्यवस्थापन जिम्मेवारी प्रकाशसँगै कृष्ण पौडेल र विनायक पुडासैनीले सम्हालिरहेका छन्। प्रकाश कृष्णलाई गुरु र अभिभावक पनि मान्छन्। उनीहरूको भेट सन् २००६ मा भएको हो। त्यस बेला प्रकाश सेफका रूपमा अनुपम फुडल्यान्डमा आवद्ध थिए। कृष्ण उक्त रेस्टुरेन्टका सञ्चालक हुन्। प्रकाश र विनायकको भेट पनि कृष्णकै माध्यमबाट भएको हो।
यी तीन जनाले दुई करोड पचास लाख रूपैयाँ लगानीमा अलेभ सञ्चालनमा ल्याएका हुन्।
रेस्टुरेन्ट प्रवेश गर्नेबित्तिकै 'टर्किस भाइब्स' महसुस हुन्छ। यहाँको इन्टेरियर डिजाइन मन्द निलो, सुनौलो, खैरो र सेतो रङको संयोजनमा तयार पारिएको छ। पृष्ठभूमिमा टर्किस धुनहरू बजिरहन्छन्।
तपाईंहरूले 'खाना सुरूमा आँखाले खानुपर्छ' भन्ने सुन्नुभएको होला। यो अनुभव अलेभमा लिन सकिन्छ। यहाँका हरेक परिकार हेर्दै स्वादिलो र स्वस्थकर देखिन्छ। स्वादमा मात्र नभई यहाँका सेफहरूले खानाको सजावटमा पनि ध्यान पुर्याउँछन्। त्यसैले ग्राहकले स्वादसँगै सजावटको पनि प्रशंसा गर्ने प्रकाश बताउँछन्।
अलेभमा थुप्रै सेलेब्रेटीदेखि व्यवसायिक घरानाका व्यक्तिहरू समेत पुगेका छन्। उनीहरूले टर्किस खाना रूचाएको र सकारात्मक प्रतिक्रिया दिएकोमा प्रकाशले खुसी व्यक्त गरे।
'एकपटक आएका ग्राहक फेरिफेरि आउँदै छन्,' उनले भने, 'यसैले काम गर्न ऊर्जा थप्छ।'
प्रकाशलाई यो 'टर्कीस आइडिया' कोरोना महामारीले फुराइदिएको हो। कोरोना नआएको भए सायद यति बेला उनी अरू कुनै होटल वा रेस्टुरेन्टमा कार्यरत हुन्थे।
यो २०७६ साल अन्त्यतिरको कुरा हो। पहिलो लकडाउनका बेला प्रकाश काठमाडौंकै एक होटलमा काम गरिरहेका थिए। महामारीको प्रभावका कारण प्रकाशले जागिर गुमाउनु पर्यो।
त्यही बेला उनको कृष्णसँग कुराकानी भयो र अलेभ कबाब सञ्चालन गर्ने योजना बन्यो।
प्रकाशले लामो समय विभिन्न होटल तथा रेस्टुरेन्टमा काम गरेका छन्। विभिन्न परिकार पकाएका छन्। बजारमा पाइने परिकारबारे अध्ययन गरेका छन्। तीमध्ये प्रायः बनाउन जान्ने थिए। तर उनलाई बजारमा सहजै उपलब्धभन्दा भिन्न परिकार पस्किन मन थियो।
उनले भने, 'नेपालमा टर्किस रेस्टुरेन्ट थिएन। बजारलाई स्वस्थ र स्वादिलो टर्किस खाना चिनाउने हुटहुटीमा अलेभ कबाब सञ्चालनमा ल्यायौं।'
प्रकाशका अनुसार टर्किस खाना पाइने रेस्टुरेन्ट र पूरा रेस्टुरेन्ट नै 'टर्की' विशेष हुनु अलग कुरा हो। त्यसैले उनी अलेभ नेपालको पहिलो टर्किस रेस्टुरेन्ट भएको दाबी गर्छन्। अलेभ २०७७ साल फागुनमा उद्घाटन भएको हो।
प्रकाशले नेपाली रेस्टुरेन्ट तथा होटलमा मात्रै होइन, चिनियाँ रेस्टुरेन्टमा पनि काम गरेका छन्। त्यही अनुभव समेटेर भविष्यमा चाइनिज रेस्टुरेन्ट सञ्चालन गर्ने मन छ।
हाल अलेभको क्षेत्रफल सानो छ। एकपटकमा ५० देखि ६० जनासम्म अटाउँछन्। दैनिक डेढ सयदेखि दुई सय ग्राहक पुग्ने गरेका छन्। प्रायः ग्राहकहरू यहाँ टेबल बुकिङ गरेरै आउँछन्।
'ग्राहक चाप व्यवस्थापनमा बुकिङ प्रणालीले सहज गर्छ। अझै पनि बुकिङ नगरी आउने कतिपय ग्राहक यत्तिकै फर्किनुपरेको छ,' उनले भने, 'तर हामी छिट्टै डाइन-इन क्षमता बढाउँदै छौं।'
अबको तीन महिनामा रेस्टुरेन्टले बस्नका लागि टेबल/कुर्सी बढाउँदैछ। अहिले खुला ठाउँ छ भने भविष्यमा निजी ठाउँ जस्तै स-सानो कोठा पनि बनाउने योजना छ।
अलेभमा अहिले प्रकाशसँगै ८ जना सेफ छन्। उनीहरूले टर्किस सेफबाट तीन महिने परामर्श लिएर भान्सा सम्हाल्न थालेका हुन्। रेस्टुरेन्टको औपचारिक उद्घाटन अघिदेखि नै उनीहरूले ती टर्किस सेफबाट पाककला सिकेका थिए। विशेष परामर्श दिनकै लागि टर्कीबाटै सेफलाई बोलाइएको उनले बताए।
टर्किस परिकारमा प्रयोग हुने मसला नेपाली मसलाको तुलनामा अलग हुन्छन्। त्यसैले ६० प्रतिशत मसला टर्कीबाट आयात हुन्छ भने बाँकी नेपाली बजारमै पाइन्छ।
प्रकाश अझै पनि आफूलाई सिकाउने टर्किस सेफसँग सल्लाह लिँदै नयाँ परिकार बनाएर मेनुमा थप्दै छन्।
अलेभमा टर्किससँगै मध्यपूर्वी राष्ट्रका परिकार पनि पाइन्छ। मेनुमा एक सयभन्दा बढी परिकार उल्लेख छ। तीमध्ये ग्राहकले सबभन्दा धेरै कबाब, खाप्सा राइस र जम्मो मेजे प्लाटर रूचाउने प्रकाशले बताए।
रेस्टुरेन्टले प्याकेजिङ र डेलिभरीको व्यवस्था मिलाएको छ। ग्राहकले फुडमान्डु, भोज डिल र पठाओबाट अर्डर गर्न सक्छन्। रेस्टुरेन्टमै पुग्ने ग्राहकलाई खाना अर्डर गर्नुअघि चोर्बा (विशेष तरिकाले पकाइएको सुप) दिइन्छ। खसीको मासुमा विभिन्न किसिमको टर्किस मसला मिसाएर करिब ३ घन्टा पकाएपछि चोर्बा तयार हुन्छ।
टर्किस खाना पकाउँदा ओलिभ (जैतुन) को तेल मात्रै प्रयोग हुन्छ। त्यस्तै ब्रेड (रोटी) पनि नेपालमा पकाइनेभन्दा भिन्न तरिकाले पकाइन्छ। प्रकाशका अनुसार अलेभ कबाबमा विशेष चार प्रकारको ब्रेड तयार हुन्छ; पिटा, खुब्ज, जातार र तिलबारा।
यी ब्रेड आँटामा आवश्यक मसला हालेर तयार पारिन्छ। यसलाई शाकाहारी वा मांसाहारी परिकारसँग खान सकिन्छ। त्यस्तै हलाल मासु मात्र प्रयोग गरिने उनले बताए।
२१ वर्षको उमेरदेखि पाककला थालेका सेफ प्रकाश यी सबै परिकार बनाउन पोख्त छन्। उनले बाह्र कक्षा सकेपछि एक इन्स्टिच्युटबाट कुकिङ कक्षा लिएका थिए। त्यसपछि एक रेस्टुरेन्टमा काम थाले। नेपालमा दुई वर्ष काम गरेको अनुभव लिएर चीन गए र केही समय त्यहीँको एक होटलमा काम गरे।
यति बेला भने प्रकाश पूर्ण रूपमा अलेभ कबाबको विस्तारमा सक्रिय छन्।
भन्छन्, 'अहिले विश्व बजारमा टर्किस परिकारलाई उच्च श्रेणीमा राखेको पाइन्छ। त्यसैले यसलाई नेपाली बजारमा पनि सहजै उपलब्ध गराउने दौडमा लागिरहेका छौं।'
1668538079.jpg)
