३४ अंकले उक्लियो नेप्से, अर्ब माथिको कारोबार


सेयर बजारको परिसूचक नेप्से ३४ अंकले बढेको छ। सो अंकको वृद्धिपछि नेप्से १६३८ अंकमा कायम भएको छ। नेप्सेमा मात्रै नभई कारोबार रकममा उल्लेख्य वृद्धि भएको छ। १५५ कम्पनीको १ अर्ब २१ करोड रुपैयाँको सेयर किनबेच भयो।

यस दिन बिमा समूह सबैभन्दा धेरै अंकले उक्लिएको छ। सो समूह ४१६ अंकले बढेको छ। त्यस्तै बैंकिङ समूह २७, होटल ६१, विकास बैंक २५, जलविद्युत ३८, फाइनान्स ५ र उत्पादन समूह २० अंकले बढेका छन्। अन्य समूह १ अंकमुनि हरियो रह्यो।

कारोबारका आधारमा नेपाल लाइफ इन्स्योरेन्स अग्रस्थानमा रह्यो। सो कम्पनीको ९ करोड २९ लाखको सेयर किनबेच भएको छ। उसको मूल्य बढेर प्रतिकित्ता २२७३ पुगेको छ।

फरवार्ड माइक्रोफाइनान्स, नेपाल इन्भेष्टमेन्ट तथा नविलको संस्थापकतर्फको सेयर कारोबार पनि उच्च रह्यो। हिमालयन डिस्टिलरी, एनबि इन्स्योरेन्स, कुबेर मर्चेन्ट फाइनान्स, राष्ट्रिय बिमा कम्पनी र प्रोग्रेसिभ फाइनान्सका लगानीकर्ताले ९ प्रतिशतभन्दा बढी नाफा कमाए।

बजारमा ठूलो अंकको वृद्धि हुँदा पनि ओम डेभलपमेन्ट बैंकका लगानीकर्ताले सबैभन्दा धेरै ९ प्रतिशत मूल्य गुमाए। वर्ल्ड मर्चेन्ट फाइनान्सको मूल्य ४ प्रतिशतले घट्यो भने अन्य मूल्य घट्ने कम्पनीहरुको गिरावट ४ प्रतिशतमुनि रह्यो।

 

Share:

© 2017 Setopati Sanchar Pvt. Ltd.