निष्क्रिय कर्जामा वर्गीकरण भइसकेको कर्जाको बाँकी सबै साँवा ब्याज भुक्तानी भएर किस्ता नियमित भएको तीन महिनापछि स्तरोन्नति गर्न पाइने भएको छ।
शुक्रबार नेपाल राष्ट्र बैंकले जारी गरेको एकीकृत निर्देशिकामा संशोधन गर्दै यस्तो व्यवस्था गरेको हो। यसअघि किस्ता नियमित भएपनि ६ महिनासम्म सुक्ष्म निगरानी वर्गमा राख्नु पर्दथ्यो।
'हामीले यसमा लचिलो नीति लिएको देखिए पनि यसमा कडाइ पनि गरेका छौं,' राष्ट्र बैंकका प्रवक्ता तथा कार्यकारी निर्देशक तथा प्रवक्ता गुरू प्रसाद पौडेलले भने, 'अब कर्जाको किस्ता नियमित भएपनि वक्यौता पूरा भुक्तानी नभई वर्गीकरणमा स्तरोन्नति गर्न पाइने छैन।'
बैंकहरूले भाका नाघेको कारण निष्क्रिय कर्जामा भइसकेका कर्जाको वक्यौता रकम भुक्तानी भएर नियमित हुन थालेको ३ महिनापछि मात्रै असल वर्गमा वर्गीकरण गर्न पाउने भएका हुन्।
यसअघि निष्क्रिय कर्जामा वर्गीकरण भएको कर्जाको वक्यौता रकम भुक्तानी भएर किस्ता नियमित भएपछि ६ महिनासम्म सुक्ष्म निगरानी कर्जामा स्तरोन्नति गर्न सकिने व्यवस्था गरिएको थियो। त्यसपछि मात्रै असल वर्गमा स्तारोन्नति गर्न पाइन्थ्यो।
अहिले बैंकहरूले कर्जाको भाका नाघेको एक महिना नुग्दासम्म असल, तीन महिनासम्म भाका नाघेको कर्जालाई सुक्ष्म निगरानीमा र तीन महिना बढी भाका नाघेकालाई निष्क्रिय कर्जामा वर्गीकरण गर्नुपर्छ।
त्यस्तै, निष्क्रिय कर्जाभित्र पनि ६ महिनासम्म भाका नाघेका लाई कमसल, एक वर्षसम्म भका नाघेकालाई शंकास्पद र एक वर्षभन्दा बढी समयदेखि भाका नाघेकालाई खराब कर्जामा वर्गीकरण गर्ने गरेका छन्।
कर्जाको वर्गीकरण अनुसार बैंकहरूले एकदेखि एक सय प्रतिशत रकमसम्म नोक्सानी व्यवस्थामा छुट्याउनुपर्छ।
अब कर्जा नियमित हुन थालेर तीन महिनामै स्तरोन्नति हुने कर्जाको लागि कम नोक्सानी व्यवस्था राखे हुने भएको छ।
