नेप्सेका कर्मचारीहरूले बिहीबार हातमा कालोपट्टि बाँधेर काम गरेका छन्।
नेप्सेको अध्यक्ष तथा प्रमुख कार्यकारी अधिकृतमा राजनीतिक स्वार्थप्रेरित नियुक्ति भएको भन्दै उनीहरूले विरोध गरेका छन्।
नेप्सेमा अध्यक्षको रूपमा हेमन्त बस्याल र प्रमुख कार्यकारी अधिकृतमा चुडामणि चापागाईं छन्।
अध्यक्ष बस्यालको कन्सल्टेन्सी र नेप्सेबीच पुरानो भुक्तानीसम्बन्धी विवाद रहँदै आएको अवस्थामा उनको नियुक्ति भएको भन्दै कर्मचारीहरूले विरोध गरेका हुन्।
अध्यक्ष बस्यालको कन्सल्टेन्सीले देखावटी 'परामर्श सेवा' प्रदान गरेको भन्दै २५ लाख रूपैयाँ भुक्तानी माग्दा नेप्सेले अस्वीकार गरेको र सोही विवाद अझै कायम रहेको कर्मचारीहरूको दाबी छ।
नेतृत्वहरूले नेप्सेलाई कमजोर बनाउन लागेको आरोप लगाउँदै कर्मचारीहरू आन्दोलनमा उत्रिएका हुन्।
मंगलबार पनि कर्मचारीहरूले नेप्सेका अध्यक्ष, सिइओलगायत उच्च तहका पदाधिकारीलाई कार्यालयमा थुनेर राखेपछि मध्यरातमा प्रहरीले उद्धार गरेको थियो।
श्रम अदालतको आदेश विपरीत नेप्सेको सञ्चालक समितिले निर्णय गरेको भन्दै मंगलबार दिउँसोदेखि नै कर्मचारी आन्दोलनमा उत्रिएको बताइएको छ।
नेप्सेका कर्मचारी युनियनले श्रम अदालतमा नाफाबाट कर्मचारीले बोनस पाउनुपर्ने मागसहित दिएको निवेदनमा बोनस दिन आदेश दिएको थियो।
तर, श्रम अदालतको आदेश विपरीत नेप्से सञ्चालक समितिले कर्मचारीलाई बोनस नदिने निर्णय गरेपछि उनीहरू आन्दोलित भएका हुन्।
नेप्से कर्मचारी संघका अध्यक्ष नवराज थापाले भने, बोनसको विषय नभई नेप्सेको संरचनात्मक सुधार र पुनर्संरचनामा देखिएको उदासीनताका कारण आफूहरूले धर्ना कार्यक्रम सञ्चालन गरेको बताएका छन्।
-1746009348.jpg)
