अर्थमन्त्री युवराज खतिवडाले सानो समूहले नेपालमा औद्योगिक वातावरण नभएको आरोप लगाउने गरेको बताएका छन्।
बुधबार राजधानीमा आयोजित एक कार्यक्रममा अर्थमन्त्री खतिवडाले त्यस्तो समूहलाई आफूले 'बैंकमा ऋणको माग बढेको पुराण लगाउन हो?' भन्दै प्रतिप्रश्न गर्ने गरेको उल्लेख गरे।
'मैले उहाँहरूलाई सोध्ने गरेको छु, त्यसो हो भने बैंकमा ऋणका लागि थाक माथि थाक निवेदन कसरी परिरहेको छ?', खतिवडाले भने, 'त्यतिधेरै कर्जाको माग पुराण लगाउन त होइन होला। व्यवसाय नै गर्नका लागि होला। यदि व्यवसाय नै गर्न हो भने त व्यवसायिक वातावरण त रहेछ नि त।'
उनले बैंकहरूसँग माग भएका कर्जाको विवरण आफूलाई दिन आग्रह गरे।
'कति वर्षसम्म लगानी गर्न पुग्ने माग सृजना भएको छ', खतिवडाले भने, 'पक्कै पनि दुई वर्षका लागि धान्ने माग सृजना भएका छन्।'
खतिवडाले बैंकहरूमा गत वर्ष २० प्रतिशतले निक्षेप बढ्दा समेत कर्जाको माग धान्न सक्ने अवस्था नबनेको बताए।
'त्यो माग धान्न बैंकहरूले पुँजी बढाउनुपर्ने आवश्यकता छ', खतिवडाले भने, 'लगानीको कुशलता बढाउनुपर्नेछ। राष्ट्रले तोकेका प्राथमिकताका क्षेत्रमा लगानी गर्नुपर्नेछ।’
उनले बैंकहरूलाई साना र मझौला उद्योगमा लगानीमा उत्प्रेरित हुन आग्रह समेत गरे।