नेपालमा हुन्डाई गाडी उत्पादन गर्ने लक्ष्मी मोटर कर्पोरेशनले भेन्यु इ भेरियन्टको उत्पादन पनि सुरू गरेको छ।
कर्पोरेशनले २०२४ मे बाट भेन्यु एस र एसएक्स उत्पादन सुरू गरेको थियो। लक्ष्मी मोटर कर्पोरेशन, नेपालको लागि हुन्डाई गाडीको आधिकारिक विक्रेता लक्ष्मी इन्टरकन्टिनेन्टलको एक भगिनी संस्था हो।
कम्पनीले नेपालमा हुन्डाई भेन्युको व्यवसायिक उत्पादन सुरू गरिएसँगै हुन्डाई नेपाल: मेड फर याेर जर्नी क्याम्पेन पनि सुरू गरेको थियो। हालसम्म करिब २५० गाडी आफ्ना डिलरहरू मार्फत बिक्री गरिसकेको जनाएको छ।
हुन्डाई भेन्यु इ को प्रारम्भिक मूल्य सीमित अवधिको लागि ४० लाख ९६ हजार रूपैयाँ कायम गरिएको छ।
यद्यपि यसमा हाल चलिरहेको दसैं तिहार लक्षित योजना र थप डिस्काउन्ट नहुने कम्पनीले जनाएको छ।
हाल नेपालमा उपलब्ध भेन्युका अरु भेरियन्टहरूको मूल्य भेन्यु (एस) १.२ को ४४ लाख ९६ हजार रूपैयाँ र भेन्यु (एसएक्स) १.२ को मूल्य ५३ लाख ५६ हजार रूपैयाँ कायम गरिएको छl
कम्पनीले मेड इन नेपाल हुन्डाई भेन्युमा १० वर्षको निःशुल्क सर्भिसिङ र ३ वर्षको वारेन्टी प्रदान गर्ने जनाएको छ।
लक्ष्मी मोटर कर्पोरेशन, नेपालमा लक्ष्मी ग्रुपको लगानी तथा हुन्डाई मोटर कम्पनीसँगको प्राविधिक सहकार्यमा स्थापना भएको हो।
स्वदेशमा नै उत्पादन गरी देशको औद्योगिकरण, आयात प्रतिस्थापन, रोजगारी सृजना, आन्तरिक राजस्वमा वृद्धि, सीप तथा प्रविधि विकास, सहायक उद्योगको स्थापना, आन्तरिक स्रोत तथा विद्युतको खपत, कुल गाहर्स्थ्य उत्पादनमा योगदानका साथ साथै उपभोक्तालाई सहुलियत मूल्यमा सवारी साधन उपलब्ध गराउने उद्देश्य रहेको कम्पनीले जानकारी गराएको छ ।
लक्ष्मी मोटर कर्पोरेसनले थप भेरिएन्ट तथा अरु मोडेलहरू पनि उत्पादन बढाउँदै जाने योजना रहेको जनाएको छ ।
