दक्षिण कोरियाली अटो कम्पनी ‘हुन्डाई’ले भारतको तमिलनाडु राज्यमा दीर्घकालीन लगानी योजना घोषणा गरेको छ।
कम्पनीले १० वर्ष (२०२३ देखि २०३२) को अवधिमा विद्युतीय सवारी साधनको इकोसिस्टमका लागि चरणबद्ध रूपमा २ खर्ब भारु लगानी गर्ने भएको बताइएको छ।
उन्सु किम, एमडी एन्ड सिइओ, हुन्डाइ मोटर इन्डिया र भी विष्णु, आइएएस, एमडी र सिइओ, गाइडेन्स तमिलनाडुबीच मुख्यमन्त्री एमके स्टालिनको उपस्थितिमा सम्झौतापत्रमा हस्ताक्षर भएको छ।
हस्ताक्षर कार्यक्रममा थंगम थेनारसु, अर्थमन्त्री टिआरबी राजा, उद्योग, लगानी प्रवर्द्धन र वाणिज्यमन्त्री कृष्णन एस, आइएएसका अतिरिक्त मुख्य सचिव, उद्योग, लगानी प्रवर्द्धन र वाणिज्य तमिलनाडु सरकार र अन्य वरिष्ठ अधिकारीको पनि उपस्थिति थियो।
सो अवसरमा उन्सु किमले भने, ‘हाम्रो दीर्घकालीन दृष्टिकोणको एक भागको रूपमा, हामीले तमिलनाडुलाई भारतमा हुन्डाईको विद्युतीय सवारी उत्पादनको आधारका रूपमा विकास र स्थापना गर्ने योजनालाई अन्तिम रूप दिएका छौं। यसले हामीलाई र हाम्रो पोर्टफोलियोलाई सुदृढ गर्न र हाम्रा गाडीमा उत्कृष्ट सुविधा र प्रविधि प्रदान गर्न मद्दत गर्ने विश्वास छ।’
कोरियाली अटो निर्माताले तमिलनाडु सरकारको विद्युतीय गतिशीलतातर्फ राज्यको दिगो प्रणाली निर्माण गर्ने दृष्टिकोणको रणनीतिक साझेदार बन्ने लक्ष्य राखेको छ।
हुन्डाइले १ लाख ७८ हजार ब्याट्री जम्मा गर्न वार्षिक क्षमताको ब्याट्री प्याक एसेम्बली इकाई स्थापना गर्ने जानकारी दिएको छ।
त्यस्तै, ५ वर्षको अवधिमा प्रमुख राजमार्गका प्रमुख स्थानमा १ सय इभी चार्जिङ स्टेसनहरू स्थापना गरिने भएको छ।
यसमा ५ डुअल अल्ट्रा–फास्ट चार्जिङ स्टेसनहरू, १० सिंगल फास्ट चार्जिङ स्टेसनहरू र ८५ एकल फास्ट चार्जिङ स्टेसनहरू स्थापना गर्ने बताइएको छ।
हुन्डाई मोटर इन्डियाले कुल उत्पादन मात्रालाई वार्षिक ८ लाख ५० हजार युनिटमा पुर्याउनेछ र श्रीपेरुम्बुदुरमा रहेको कारखानाबाट नयाँ विद्युतीय र आईसीई सवारी साधन उत्पादन गर्ने कम्पनीको भनाइ छ।
