नेपाली बजारमा महिन्द्रा एक्सयुभी–३०० भित्रिएको छ।
सार्वजनिक गरिएका एसयुभी चार भेरियन्टमा उपलब्ध हुने र यसको मूल्य ४२ लाख ९५ हजार रुपैयाँदेखि सुरू हुने कम्पनीको भनाइ छ।
नेपालमा नयाँ ग्राहकहरूलाई स्वागत गर्न डब्ल्यू४ भेरियन्टलाई २०१९ मा जस्तै परिचयात्मक मूल्यमा उपलब्ध गराउने कम्पनीले बताएको छ।
शक्तिशाली इन्जिन, उन्नत सुविधाहरू र स्टाइलिश डिजाइनको साथ, एक्सयुभी–३०० ले नेपाली ग्राहकहरूलाई असाधारण ड्राइभिङ अनुभव प्रदान गर्ने कम्पनीको विश्वास छ।
एक्सयुभी–३०० लाई सुरक्षालाई उच्च प्राथमिकतामा राखेर डिजाइन गरिएको छ। जसले यसलाई नेपालको सबैभन्दा सुरक्षित सवारी साधनहरूमध्ये एक बनाएको कम्पनीको भनाइ छ।
यसमा डुअल फ्रन्ट एयरब्यागहरू, इबिडी सहितको एबीएस, रिभर्स पार्किङ सेन्सरहरू र अन्य धेरै सुरक्षा सुविधाहरू छन्, जसले प्रत्येक यात्रामा यात्रुहरूको सुरक्षा सुनिश्चित गर्छ।
एक्सयुभी–३०० ले ग्लोबल एनसिएपी सुरक्षा परीक्षणहरूमा पनि ५–स्टार रेटिङ प्राप्त गरेका कारण यसले नेपाली सडकका लागि भरपर्दो र सुरक्षित विकल्प बनाएको कम्पनीले बताएको छ।
एसयुभीमा ७ इन्चको टचस्क्रिन इन्फोटेनमेन्ट प्रणाली, स्टेयरिङ माउन्टेड कन्ट्रोल र पुस बटन स्टार्टरस्टप जस्ता उन्नत प्रविधि सुविधाहरूको दायरा पनि छ।
थप रूपमा, शीर्ष–अफ–द–लाइन डब्ल्यू८ भेरियन्टले सनरुफ, लेदरको सिट र डुअल–जोन अटोमेटिक क्लाइमेट कन्ट्रोल प्रदान गर्ने कम्पनीले बताएको छ।
एक्सयुभी–३०० मा १.२ लिटर टर्बो–पेट्रोल इन्जिनले ११० पीएस र २०० एनएम टर्क प्रदान गर्दछ। इन्जिन ६ स्पीड म्यानुअल गियरबक्ससँग जोडिएको छ।
दुईवटा एयरब्याग, एबीएस, सबै पाङ्ग्रामा डिस्क ब्रेक, एलईडी टेल–लाइट र चारवटै पावर विन्डोज सबै मोडलहरूमा मानक छन् ।
महिन्द्रा एण्ड महिन्द्रा लिमिटेडका इन्टरनेशनल अपरेसन प्रमुख सचिन आरोलकरले एक्सयुभी–३०० लाई बजारको अद्वितीय आवश्यकताहरू पूरा गर्ने नयाँ भेरियन्ट मिक्सको साथ नेपालमा ल्याउन पाउँदा उत्साहित भएको बताए।
एक्सयुभी–३०० को सुविधाहरू र विकल्पहरूको विस्तृत प्याकेज नेपाली उपभोक्ताहरूका लागि एक आकर्षक मूल्य प्रस्ताव हुने उनले बताए।
कम्पनीका अनुसार चार भेरियन्ट डब्ल्यू४, डब्ल्यू६ , डब्ल्यू८ र डब्ल्यू८ ओ मा यस एसयुभी उपलब्ध रहेको छ।
जसमा डब्ल्यू ४ को मूल्य ४२ लाख ९५ हजार रुपैयाँ, डब्ल्यू६ को मूल्य ४९ लाख ९५ हजार, डब्ल्यू८ ५७ लाख ५० हजार र डब्ल्यू८ ओ को मूल्य ६० लाख रुपैयाँ तोकिएको छ।
एक्सयुभी–३०० सिरिज ७ रङहरू रेड रेज, एक्वा मरिन, डार्क ग्रे, पर्ल ह्वाइट, नेपोली ब्ल्याक, डी–स्याट सिल्भर र ब्लेजिङ ब्रन्जमा उपलब्ध रहेको कम्पनीले बताएको छ।
नयाँ स्पोर्टी डिजाइन तत्वहरू रातो ग्रिल इन्सर्ट, कालो लेदरको भित्री भाग, क्रोम–फिनिस पेडलहरू र डुअल–टोन एक्सटेरियरहरूका विकल्पहरूले यो गाडीले उच्च प्रदर्शन ल्याउने कम्पनीको भनाइ छ।
