बजारमा अनारको मूल्य बढेको छ। माग अनुसार आपूर्ति नभएकाले अनारको मूल्य बढेको नेपाल फलफूल थोक व्यवसायी संघ, काठमाडौंका उपाध्यक्ष मेघनाथ चौलागाईंले जानकारी दिए।
‘तिहारपछि अनार एकदमै कम आएको छ। त्यही भएर मूल्य बढेको हो,’ उनले भने।
उनका अनुसार अहिले अनार होलसेलमा प्रतिकिलो तीन सय ९० देखि चार सय रूपैयाँसम्म पुगेको छ। दुई/तीन दिन अघि किलोको तीन सय रूपैयाँ थियो।
अहिले अनारको सिजन हो। तर यसको स्वदेशी उत्पादन छैन। यहाँ अनार छिमेकी मुलुक भारतबाट आयात हुने भएकाले मूल्य भारतीय बजारले निर्धारण गर्छ।
‘भारतमा भन्दा यहाँ बढी मूल्य पाउने देखियो भने व्यापारीहरूले यता बेच्छन्, भारतमा महँगो पाएसम्म त्यहीँ बेच्छन्,’ उनले।
अहिले भारतमै अनारमै मूल्य बढेकाले यहाँ आपूर्ति कम भएको उनको भनाइ छ।
थोक मूल्य बढेसँगै अनारको उपभोक्ता मूल्य पनि बढेको छ। अहिले उपभोक्ताले अनार प्रतिकिलो किलोको चार सय ८० रूपैयाँसम्म तिर्नु परेको छ।
त्यसअघि तीन सय ५० रूपैयाँसम्म थियो।
-1746009348.jpg)
