बजारमा कुरिलोको मूल्य घटेको छ।
कालीमाटी फलफूल तथा तरकारी बजार विकास समितिको तथ्यांकले यस्तो देखाएको हो।
समितिको तथ्यांक अनुसार शुक्रबार कालीमाटी बजारमा कुरिलो प्रतिकिलो थोक मूल्य न्यूनतम आठ सय रूपैयाँदेखि अधिकतम नौ सय सय रूपैयाँमा कारोबार भइरहेको छ।
साता/दश दिनअघि कालीमाटी बजारमा कुरिलो न्यूनतम १२ सय रूपैयाँदेखि अधिकतम १८ सय रूपैयाँसम्ममा कारोबार भइरहेको थियो।
गत आइतबार थोरै घटेर न्यूनतम १२ सय रूपैयाँदेखि १६ सय रूपैयाँमा कारोबार भइरहेको थियो।
बजारमा कुरिलोको आपूर्ति बढेकाले मूल्य घटेको कालीमाटी बजारका व्यवसायी राज कुमार थापा क्षेत्रीले जानकारी दिए।
उनका अनुसार बजारमा कुरिलोको भाउ घटबढ भइरहेको छ।
'बजारमा धेरै आयो भने सस्तो हुन्छ। थोरै आयो भने महँगो हुन्छ,' उनले भने।
व्यवसायी राज कुमारका अनुसार कुरिलोको गुणस्तरका आधारमा मूल्य निर्धारण गरिएको छ। अहिले कुरिलोको अफ सिजन हो। बर्खा लागेसँगै कुरिलो सस्तो हुन्छ।
थोक मूल्य घटेसँगै कुरिलोको खुद्रा मूल्य पनि घटेको छ।
