बजारमा गोलभेँडाको मूल्य घटेको छ।
मागभन्दा बढी आपूर्ति भएकाले गोलभेँडाको मूल्य घटेको कालीमाटी तरकारी बजारका गोलभेँडा व्यापारी ज्ञानेन्द्र श्रेष्ठले जानकारी दिए।
'अहिले गोलभेँडा एकदमै धेरै आइरहेको छ,' उनले भने, 'त्यसैले मूल्य घटेको हो।'
उनका अनुसार पछिल्लो एक÷दुई महिनायता गोलभेँडाको मूल्य घट्ने क्रममा छ। कालीमाटी बजारमा एक महिनाअघि गोलभेँडा थोक मूल्य प्रतिक्रेट सात सयदेखि आठ सय रूपैयाँमा कारोबार भइरहेकोमा अहिले प्रतिक्रेट तीन सयदेखि पाँच सय रूपैयाँमा कारोबार भइरहेको छ।
बजारमा गोलभेँडा बिक्री नभएका कारण किसानको बारीबाट गोलभेँडा उठाउन नसकिएको उनले बताए।
कालीमाटी फलफूल तथा तरकारी बजार विकास समितिको तथ्यांक अुनसार बजारमा गोलभेँडा ठूलो, लोकल सानो र लोकल टनेल गरी तीन प्रकारको आउँछ।
ठूलो गोलभेँडा भने भारतबाट पनि भित्रिने गरेको छ।
बिहीबार कालीमाटी बजारमा ठूलो गोलभेँडा प्रतिकिलो थोक मूल्य २० देखि ४० रूपैयाँ छ।
त्यस्तै, सानो तराई गोलभेँडा १४ रूपैयाँ छ।
हाल काठमाडौंमा चितवन र सर्लाहीबाट गोलभेँडा भित्रिरहेको छ।
होलसेल मूल्य घटेसँगै गोलभेँडाको खुद्रा मूल्य पनि घटेको छ।
