पकाउँदा र भोजन गर्दा समेत मगमग बास्ना चल्ने स्वादिष्ट बासमती चामललाई संरक्षण गर्ने ध्येयले राष्ट्रिय खाद्य बैंक कम्पनीले मुलुकका विभिन्न जिल्लामा बासमती धानको व्यावसायिक खेती सुरूआत गरेको छ।
झापा, कैलाली, बर्दिया र कास्की लगायतका जिल्लामा यस वर्ष ५०० बिगाहा जग्गा भाडामा लिएर कम्पनीले बासमती धानको बीउ रोप्न सुरूआत गरेको कम्पनीका अध्यक्ष शंकरनाथ उप्रेतीले बताए।
कम्पनीले झापाको गौरादह नगरपालिका वडा नं २ र ७ मा ५० बिगाहा जग्गा लिजमा लिएर बासमती धानको खेती सुरू गरेको छ।
शनिबार सयभन्दा बढी रोपाहार लगाएर परम्परागत रूपमै धुमधामका साथ रोपाइ गरेको थियो।
स्थानीय १३ किसानको ५ बिगाहा जमिन प्रतिबिगाहा वार्षिक रु ३५ हजारका दरले भाडामा लिइएको उनले जानकारी दिए।आगामी वर्षदेखि झापामै सयौ बिगाहामा बासमाती धानको खेती विस्तार गर्ने योजना रहेको उनले जानकारी दिए।
कम्पनीको झापाका संयोजक धनञ्जय चुँडालका अनुसार गौरादहमा कालो नुनिया, हुलास बासमती, हाइव्रिड कालो नुनिया र रैथाने बासमतीको बिउ रोपिएको छ।
स्थानीय डिल्लीप्रसाद सेढाईंले कम्पनीलाई चार बिगाहा जग्गा भाडामा दिइएको जानकारी दिए।
विगतमा आफूले उत्पादन गरेको धान समयमै विक्री नहुने, विचौलियाका कारण सस्तो मूल्यमा बेच्नुपर्ने, खेतीमा मजदूर नपाउने आदि कारणले हैरान भइरहेको अवस्थामा कम्पनीले जग्गा लिजमा लिँदा खुसी लागेको प्रतिक्रिया दिए।
यस वर्ष कम्पनीले परम्परागत रूपमै खेती गरेको कारण खेत जोत्न, बिउ उखेल्न र रोपाइँ गर्न स्थानीयबासीले नै रोजगारी पाएका छन्। अर्को सालदेखि यान्त्रिकीकरण गरेर खेती गरिने कम्पनीले जनाएको छ।
कृषिको उत्पादन, भण्डारण र विक्री वितरण आफैंले गर्ने नीति अनुरूप देशैभर धान खेती गर्ने यो पहिलो कम्पनी हो।
जिल्लामा कूल ८७ हजार ५०० हेक्टर क्षेत्रमा धानखेती भइरहेको छ। तीमध्ये ६ देखि ७ प्रतिशत मात्र बासमती धानको खेती हुँदै आएको कृषिज्ञान केन्द्रका विज्ञ शालिकराम भट्टराईले जानकारी दिए।
अन्य धानको तुलनामा यसको उत्पादन कम हुने र पाक्ने समय पनि बढी हुने हुँदा किसानहरुको यसप्रति खासै रुची नभएको उनको भनाइ छ।
‘पुराना र धनाढ्य किसानले मात्र बासमती धानको खेती गरिरहेका छन्’, उनले भने, ‘अरू धान पाक्दा यो धान पसाउन मात्र सुरू गर्छ। मगमग बासना धेरै आउने हुँदा कीराहरू बढी लाग्ने र उत्पादकत्व घट्ने हुँदा व्यवसायिक किसानले यसको खेती गर्दैनन्।’
रोपेको १२० दिनमा मन्सुली लगायतका धान पाक्ने भए पनि बासमती धान १५० दिनमा मात्र पाक्ने उनको भनाइ छ।
थोरै भए पनि झापाको पूर्वोत्तर क्षेत्र बाहुनडाँगी र दक्षिण क्षेत्रमा बासमति धानको खेती हुने गरेको छ। तर, राष्ट्रिय खाद्य बैंकले जिल्लामा गरिरहेको बासमती धानको खेतीबारे कृषिज्ञान केन्द्रमा कुनै पनि जानकारी नआएको बताए।
दुई अर्बको पुँजी रहेको खाद्यान्न बैंकका ७७ वटै जिल्लामा कार्यालय रहेको र मुलुकका ७५३ वटै स्थानीय तहमा कार्यक्षेत्र रहेको अध्यक्ष उप्रेती बताए।
कृषि, माटो, बनस्पति, वातावरण, पर्यटन तथा जलस्रोत विज्ञहरू, कृषि प्राविधिक र कोरिया, जापान, चीनबाट कृषि तालिम लिएका अनुभव प्राप्त व्यक्तिहरूको संयुक्त लगानीमा यो बैंकको स्थापना गरिएको उनको दाबी छ।
बैंकमा हालसम्म ५८७ जना प्रमोटर शेयर सदस्य रहेको र निकट भविष्यमै यसले एक हजार शेयर सदस्य पुर्याउने लक्ष्य लिएको छ।
झापा, मोरङ र सुनसरीका लागि नमूना परियोजनाका रूपमा गौरादहमा यसले धान खेती गरेको जनाएको छ।
अन्य प्रजातिको धानको तुलनामा बासमती धानमा पोषक तत्वको मात्रा बढी हुने हुँदा यसको खेती गरिएको उनले बताए।
उनका अनुसार फुड एण्ड न्यूट्रिसनको बारेमा जानकारी दिलाउने, पोषणयुक्त खानेकुरा उत्पादन गर्ने र अर्ग्यानिक कृषि उपजहरू उत्पादनमा लगाउने बैंकको मुख्य लक्ष्य रहेको छ।
लाखौंलाई रोजगार दिने र परनिर्भरतालाई घटाएर मुलुकलाई कृषिउपजमा आत्मनिर्भर बनाउने उनले बताए। रासस
