कोरियाको जेछनमा रहेको एउटा सपिङ कम्प्लेक्समा आगलागी हुँदा २४ जनाको मृत्यु भएको छ भने २० जना घाइते भएका छन्।
राजधानी सोलदेखि १७० किलोमिटर दक्षिणमा रहेको उक्त कम्प्लेक्समा बिहिबार अपरान्ह ३ बजेर ५३ मिनेट जाँदा आगो लागेको छुंगबुक अग्नि नियन्त्रक केन्द्रले जनाएको छ।
८ तले उक्त भवनको ग्राउण्ड फ्लोरमा रहेको पार्किङस्थलबाट सुरु भएको आगो अनियन्त्रित भै फिटनेस सेन्टर, रेस्टुरेन्ट हुँदै ,सार्वजनिक साउनामा समेत पुगेको बताइएको छ।
मृत्यु हुनेमा अधिकांश साउनामा आराम गरिरहेका मानिस छन्। बाहिरबाट आगोले घेरिएपछि उनीहरू बाथरूम भित्रै फसेका थिए।
धुवाको मुस्लोबाट घाइते भएका २० जनालाई उद्वार गरि अस्पताल पुर्याइएको छ। घाइते केहीको अवस्था गम्भीर रहेकोले मृत्यु हुनेको संख्या बढ्न सक्ने अनुमान गरिएको छ। आगो के कति कारणले लाग्यो भन्नेबारे छानबिन भैरहेको बताइएको छ।
