ग्लोबल नेपाली
जतिबेला उत्सव थपलिया अस्ट्रेलिया पुगेका थिए। कोभिडको कारणले गर्दा कलेजमा पढाइ थिएन। सन् २०२१ को मार्चमा हुने चुनावको तयारी चलिरहेको थियो। उनका साथीहरूमार्फत् उनले त्यो बेला युनिभर्सिटीको फिल्डमा काम गर्ने भारतीय मूलका अस्ट्रेलियन नागरिक शिव गुरू स्वामीसँग भेट गरे।
उनीमार्फत् थपलियाको भेट वेस्टर्न अस्ट्रेलियाकी सांसद इमिली ह्यामिल्टनसँग भयो।
ह्यामिल्टन नजिकिँदै गरेको निर्वाचनमा लेबर पार्टीको तर्फबाट उम्मेदवार समेत बनेकी थिइन्। उनले ती उम्मेदवारको फोटो/भिडिओ खिच्ने काम गरेका थिए। नेपालमा तुइन फिल्मको निर्देशन गरेका थपलियालाई भिडिओको जानकारी थियो। उनले निर्देशन गरेको फिल्म तुइन वासिङ्टन फिल्म फेस्टिबलमा समेत छानिएको थियो। नेपालमै हुँदा जानेको भिडिओ,फोटोको आइडियाले उनलाई अस्ट्रेलियामा थप सहज भयो।
'प्रदेश सांसदको उम्मेदवारलाई सोसल मिडिया चलाउने मान्छे चाहिएको छ। कसैसँग फोटो भिडिओको ज्ञान भएको भए सहयोग होस् भन्ने मान्छे खोजिरहनुभएको छ भनेर साथीले भनेपछि म तयार भएँ,' उनले भने, 'मैले ट्रायलमा गरेको काम उहाँलाई मन पर्यो। पछि मैले अन्य २ उम्मेदवारको समेत सामाजिक सञ्जालमा फोटो भिडिओ राख्न भोलेन्टियर काम गरेँ। संयोगवस सबैले चुनाव पनि जित्नुभयो।'
निर्वाचनपछि थपलियाले एच मुवारकाईको सचिवालयमा रहेर काम गरे। त्यहाँ काम गरेकै कारण उनले त्यहाँको भित्री राजनीति बुझ्ने मौका पाए। पार्टीमा सक्रिय हुने मान्छे नभएपछि उनको सक्रियता थप काम लाग्यो। केही समय सांसदको सचिवालयमा रहेर काम गरेपछि उनले यातायात विभागमा काम गरे।
त्यही क्रममा उनीसहित अन्य देशका विद्यार्थीहरू मिलेर मल्टिकल्चर लेबर अर्गनाइजेसन गठन भयो। सन् २०२२ मा भएको संघीय निर्वाचनमा आप्रवासीहरूको सबभन्दा धेरै भोट लेबर पार्टीलाई गयो। त्यसपछि लेबर पार्टीका नेताहरूको नजरमा थपलिया अझै परे।
मार्क मेगावान प्रिमियर रहेको बेला थपलियाले मेगावनको सचिवालयमा काम गर्ने मौका पाए। मेगावानले पारिवारिक कारण देखाएर राजीनामा दिएपछि रोजर कुक प्रिमियर बने। त्यो बेला थपलिया उनी सिनियर पोलिसी एड्भाइजर बन्न सफल भए। प्रिमियरका १३ जना सल्लाहाकारमध्ये उनी एउटा थिए। थपलियाको मुख्य जिम्मेवारी भनेको बहुभाषी र बहुसांस्कृतिक समुदायका समस्या पहिचान गरेर प्रिमियरलाई सुझाव दिने थियो।
अस्ट्रेलियामा निर्वाचन नजिकिँदै गरेकाले अहिले उनी प्रिमियर अफिसमा काम गर्दैनन्।
लेबर पार्टी पश्चिम अस्ट्रेलियाको केन्द्रीय सदस्य रहेका थपलिया अहिले पार्टी राजनीतिमा समेत सक्रिय छन्।
शरणार्थी, आप्रवासी र अपाङ्गता भएकोहरूको हकहितमा काम गर्ने थपलिया एज्ड केयर र डिसेबलिटीको क्षेत्रमा समेत काम गर्छन्। पश्चिम अस्ट्रेलियाको पर्थबाट अन्तर्राष्ट्रिय सम्बन्धमा स्नातकोत्तर गरेका थपलियाले त्यहाँको राजनीतिमा आफूले लामै बाटो देखेको बताए।
पश्चिम अस्ट्रेलियाको प्रिमियरलाई नेपालसँग तुलना गर्ने हो भने यहाँको मुख्यमन्त्री जस्तै हो। नेपालमा प्रदेश मुख्यमन्त्री र उनको सचिवालयमा काम गर्नेको रबाफै बेग्लै हुन्छ। तर त्यहाँ भने प्रिमियरले सरकारी गाडी समेत नचढ्ने र सामान्य जीवनशैली अपनाउने उनले बताए।
'प्रिमियरले त सामान्य कफीसपमा गएर कफी बिस्कुट खाएर पैसा तिरेर हिँड्छन्। आफै गाडी चलाउँछन् भने हामी सल्लाहकारले ठूला कुरा गरेर हुन्छ?,' उनले भने, 'मेरो मामाघर सर्लाही हो। त्यहाँ मुख्यमन्त्री आए भने २५/३० वटा गाडीको बीचमा मुख्यमन्त्रीको गाडी हुन्छ। उता त्यस्तो कल्पनै गर्न सकिन्न।'
नेपालीहरू विदेशमा गएर पनि यतैको जस्तो राजनीति गरेकोमा उनलाई चित्त बुझेको छैन। अस्ट्रेलियामा राजनीति गर्ने भए त्यहीको पार्टीको राजनीति गर्नुपर्ने भन्दै उनले कांग्रेस, एमाले, माओवादी लगायतको संगठनमा बस्नुको कुनै अर्थ नहुने तर्क गरे।
'हामी किन विदेशियौं भन्दा यहाँ अवसर नपाएर हो। तर उता पनि गएर यहीको राजनीति गरिरहेका छौं। टोल-टोलामा पार्टी, जातीय अनि क्षेत्रीय संगठन छन्। यसकै लागि हामी आपसमा लडिरहेका छौं,' उनले भने, 'हामीले बरू उतैको पार्टीमा सक्रियता देखाएर नेपाली समुदायको लागि केही गर्न सक्छौं। इण्डियनहरूलाई सामुदायिक भवन बनाउन परेमा तत्काल मिलियन बजेट आउँछ।हामीलाई कार्यक्रम गर्न हजार डलर माग्नुपर्छ।'
सेतोपाटी ग्लोबलका अन्य सामग्री पढ्न यहाँ क्लिक गर्नुहोस्
ग्लोबल नेपालीबारे यो इमेलमा सम्पर्क गर्नुहोस्- setopatidebate@gmail.com
-1742801159.jpg)
