गैरआवासीय नेपाली संघ (एनआरएनए) जापानको अध्यक्षमा सिद्धार्थ श्रेष्ठले आफ्नो उम्मेदवारी घोषणा गरेका छन्।
वर्तमान कार्यसमितिमा उपाध्यक्ष रहेका श्रेष्ठले आगामी कार्यकाल (२०२५-०२७) का लागि अध्यक्षको उम्मेदवारी घोषणा गरेका हुन्।
बागलुङका श्रेष्ठ सन् २००९ मा जापान गएका हुन्।
एनआरएनए जापानको सदस्य, प्रवक्ता, महासचिव हुँदै उपाध्यक्ष बनेका श्रेष्ठले यस पटक अध्यक्षको उम्मेदवारी दिएका हुन्। एनआरएनए जापानकै अर्का उपाध्यक्ष एवम् व्यवसायी सुभास लामिछानेले पनि अध्यक्षका लागि आफ्नो उम्मेदवारी घोषणा गरेका छन्।
जापानमा रहेका नेपालीको समस्या समाधानका लागि पहल गर्नु आफ्नो पहिलो काम रहेको श्रेष्ठले बताए।
'जापानको जेलमा रहेका, हस्पिटलमा रहेका, पार्कमा अलपत्र जीवन बिताइरहेका नेपालीको उद्धारमा मैले सधैं काम गरिरहेको छु। भोलिका दिनमा पनि यसलाई निरन्तरता दिन्छु,' श्रेष्ठले सेतोपाटीसँग भने, 'म सामान्य व्यवसायी हो। धेरै ठूलो आश्वासन दिएर हुँदैन। मेरो मुख्य एजेण्डा भनेकै नेपालीको समस्यामा सँगै हुने हो।'
नेपालमा रहँदा तेक्वान्दोका खेलाडी भएकाले श्रेष्ठले आफ्नो पहलमा बागलुङमा २ सय भन्दा धेरै अट्ने कबर्ड हल बनाएका छन्।
सन् २०१६ देखि आफैले रेस्टुरेन्ट सुरू गरेका श्रेष्ठले खाना सप्लाइमा समेत लगानी गरेका छन्।
नेपाल सरकारसँग समन्वय गरेर दूतावासको सेवालाई चुस्त बनाउन प्रयास गर्ने भन्दै श्रेष्ठले जापान आउदा महँगो भाडा तिर्नुपर्ने समस्यालाई समेत समाधान गर्न जरूरी रहेको बताए।
'नेपाली उत्पादनलाई जापानमा बजार खोज्ने अनि नेपालमा जापानी पर्यटक भित्र्याउन पहल गर्नु मेरो अर्को एजेण्डा हो,' उनले भने।
-1746009348.jpg)
