अमेरिकाको ग्रीनकार्ड लिने क्रममा हुनुहन्छ वा लिइसक्नुभएको छ भने तपाईंका गतिविधिको निगरानी हुन्छ। सामाजिक सञ्जालमा फोटो र भिडिओ पोस्ट गर्दा वा आफ्नो धारणा प्रकट गर्दा होसियार रहनुपर्छ।
अमेरिकी राष्ट्रपति डोनाल्ड ट्रम्पले कार्यकारी आदेशमार्फत यसको थप निगरानी गर्ने तयारी गरेका छन्।
अमेरिकाको न्यूयोर्कमा रहेका कानुन व्यवसायी वासु फुलाराका अनुसार सामाजिक सञ्जालमा कुनै सामग्री पोस्ट गर्नुअघि निकै राम्ररी सोच्नुपर्छ। अमेरिकामा बस्नेको मात्र होइन, भिजिट भिसा र अरू कार्यक्रममा अमेरिका जान चाहनेको पनि निगरानी हुन्छ। यसअघि पनि निगरानी हुन्थ्यो तर अब झन् कडाइ हुन्छ। कसैको एउटै पोस्टका कारण ग्रीनकार्ड नपाउने र पाइसकेको रद्द पनि हुन सक्छ।
आफूले राखेका विगतका पोस्टहरू डिलिट नै गरेको छ भने पनि रेकर्डमा हुन सक्छ। अमेरिकालाई हानि पुर्याउने, कसैलाई धम्की दिने वा हत्याहिंसालाई बढावा दिने खालको धारणा सामाजिक सञ्जालमा राख्नु हुँदैन।
ट्रम्प प्रशासनको यस्तो तयारीसँगै अमेरिकामा रहेका र अमेरिका जान चाहनेले अपनाउनुपर्ने सावधानीका विषयमा केन्द्रित रहेर न्यूयोर्कमा कार्यरत कानुन व्यवसायी फुलारासँग हामीले कुराकानी गरेका छौं।
ट्रम्प प्रशासनले गर्ने भनेको सामाजिक सञ्जाल निगरानी कस्तो हो?
अमेरिका जाने, अमेरिकामा स्थायी बसोबास गर्ने तयारी गरिरहेका र ग्रीनकार्ड लिएकाहरूले फेसबुक, टिकटक, युट्युब, एक्स, इन्स्टाग्राम जस्ता सञ्जालमा कस्तो गतिविधि गरिरहेका छन् भनेर निगरानी हुन लागेको हो।
यस्ता व्यक्तिले सामाजिक सञ्जालमा दिने सूचना कस्तो हुन्छ, भ्रम फैलाएको छ कि यथार्थ कुरा लेखेको छ भन्ने हेरिने भएको छ।
यसबारे ट्रम्प प्रशासनले कार्यकारी आदेश जारी गर्ने सम्बन्धमा बहस समेत हुन थालेको छ। विशेष गरेर अमेरिकाको राष्ट्रिय सुरक्षामा असर पार्ने गतिविधि गरेको छ कि छैन भनेर निगरानी गर्न खोजिएको हो।
अमेरिकाको ग्रीनकार्ड लिने क्रममा रहेकालाई मात्र असर गर्ने हो कि लिइसकेकाले पनि होसियारी अपनाउनुपर्ने हो?
ग्रीनकार्ड पाउनासाथ अब मलाई कसैले चलाउन सक्दैन भन्ने सोच्नु हुँदैन। ग्रीनकार्ड लिने र लिएको व्यक्तिले कुनै दिन अमेरिकाको नागरिकता पनि लिन्छ भन्ने मान्यता रखिन्छ।
सिटजनसिप (नागरिकता) को लागि फाइल (आवेदन) गरेपछि उसको पृष्ठभूमि र विगत खोतल्ने काम हुन्छ। कुनै बेला व्यक्तिले लेखेको कुरा उसकै विरूद्धको प्रमाण हुन सक्छ।
त्यस्तो अवस्थामा अमेरिकाको नागरिकता नपाउने र ग्रीनकार्ड खारेज हुने निर्णय हुन सक्छ। अमेरिकामा शरणार्थी भिसाको प्रक्रिया चलेको छ भने पनि सामाजिक सञ्जालमा जथाभावी लेख्नेहरू कारबाहीमा पर्न सक्छन्।
लिइसकेको नागरिकता त खारेज हुँदैन नि?
नागरिकता खारेज गर्ने भनेको धेरै जटिल प्रक्रिया हो। कुनै आदेशका भरमा कसैको नागरिकता खारेज हुँदैन। संघीय अदालतमा मुद्दा परेर त्यसको सुनुवाइ भएपछि खारेजीको प्रक्रियामा जान सक्छ। यो धेरै परको कुरा हो।
राष्ट्रिय सुरक्षामा असर पार्ने, आतंकवादी समूहमा लागेको र गम्भीर अपराधमा संलग्न भएको प्रमाणित भएमा नागरिकता खारेज हुनसक्छ। सिफारिसका भरमा कसैको नागरिकता खारेज हुन सक्दैन।
ग्रीनकार्डको प्रक्रियामा रहेका र पाइसकेकाहरूले सामाजिक सञ्जालमा कस्तो सावधानी अपनाउनुपर्छ?
सामाजिक सञ्जालमा आफ्ना धारणा राख्दा ध्यान दिनुभएन भने जुनसुकै बेला भिसा रद्द हुनसक्छ। अर्को कुरा, नियमित रूपमा कर तिरेको छैन, आर्थिक अनुशासनमा छैन भने अप्ठ्यारो हुनसक्छ।
अनावश्यक रूपमा सरकारी सेवा लिएको छ भने पनि निगरानी हुन्छ। ग्रीनकार्ड पाउनु अगाडिको प्रक्रिया पनि यही हो। कुनै अपराधमा मुछिएको हुनु हुँदैन। एक ठाउँबाट अर्को ठाउमा बसाइँ सरेको छ भने सूचना दिनुपर्छ। आफू बस्ने घर, फ्ल्याट परिवर्तन भएमा पनि जानकारी दिनुपर्छ।
सामाजिक सञ्जाल प्रयोग गर्दैगर्दा अपनाउनुपर्ने होसियारी के के हो?
आफूलाई लागेको कुरा फेसबुकमा लेख्ने, टिकटकमा, एक्समा वा इन्स्टाग्राममा भिडिओ राख्ने गरिन्छ। कसैको कुरामा चित्त बुझेन भने पनि मनलाग्दी तरिकाले कमेन्ट समेत गर्ने बानी छ। नेपाली भाषामा लेखेको त हो नि अंग्रेजीमा अनुवाद नहोला भन्ने लाग्न सक्छ। अमेरिकामा सरकारसँग कुनै भाषाको ज्ञान र त्यसको पहुँच नहुने भन्ने हुँदैन।
सामाजिक सञ्जालमा व्यक्तिको गतिविधिबारे कसैले उजुरी दिन पनि सक्छ?
उजुरी पर्यो भने त सक्किगयो नि! उजुरी दिन पनि परेन, सामाजिक सञ्जाल नियन्त्रण गर्ने भनेपछि आफै माग्छ।
अध्यागमनले मागेको बेला मेरो सामाजिक सञ्जालको विवरण दिन्नँ भन्न मिल्दैन। आफूलाई चित्त बुझेन भने अदालतमा जाने कुरा छँदैछ तर आफूले केही लेख्दा होसियारी अपनाउनै पर्छ। आफ्ना स्टाटस डिलिट गरेर मात्र हुँदैन, त्यो त रेकर्डमा भेटिन सक्छ भन्ने कुरा भुल्नु हुँदैन।
नेपालबाट भिसाको आवेदन दिनेहरूको पनि सामाजिक सञ्जाल निगरानी हुन्छ?
दूतावासले तपाईं कुन कुन सामाजिक सञ्जाल प्रयोग गर्नुहुन्छ भनेर सोध्न सक्छ। त्यो भनेको निगरानी नै गरेको हो।
अमेरिकामा बस्नेको मात्र निगरानी गर्ने होइन। पर्यटक भिसामा अमेरिका जान खोज्नेको समेत निगरानी हुन्छ। यसअघि पनि सोध्थ्यो, अनुगमन गर्थ्यो, अहिले पनि जारी छ।
अब कडा खालको निगरानी हुन्छ भन्ने हो। कोही अमेरिका जाने योजनामा छ, जसले ग्रीनकार्डको प्रक्रिया सुरू गरेको छ वा भविष्यमा गर्नेवाला छ, यस्तो व्यक्तिले विचार पुर्याउनुपर्छ।
कस्तो धारणा राख्नेलाई अप्ठ्यारो पर्न सक्छ?
पहिलो त अमेरिकाको बारेमै के लेखेको छ भन्ने हुन्छ। उसले अमेरिकाबारे जथाभावी लेख्ने गरेको छ कि, समाजलाई हानि हुने खालको लेखेको छ कि, हत्याहिंसामा बढवा दिने खालको धारणा छ कि भनेर अध्यागमनले निगरानी गर्न सक्छ।
ग्रीनकार्ड लिएका या लिने प्रक्रियामा रहेकाहरूले सामाजिक सञ्जालको प्रयोगसँगै अपनाउनुपर्ने अरू सतर्कता के हो?
ग्रीनकार्ड पाउने आधारबारे बुझ्नुभन्दा पहिला अमेरिकामा हुने विभिन्न खालका ग्रीनकार्डबारे बुझ्न जरूरी छ।
एउटा ग्रीनकार्ड परिवारमा आधारित हुन्छ। यस अन्तर्गत सिटजनसिप पाएका व्यक्तिका श्रीमती र छोराछोरीले ग्रीनकार्ड पाउँछन्। ग्रीनकार्ड पाएको व्यक्तिले पनि आफ्नो परिवार ल्याउन सक्छ र ग्रीनकार्डको प्रक्रिया गर्न पाउँछ।
अर्को ग्रीनकार्ड कम्पनीले स्पोन्सर गर्ने खालको हुन्छ। डाइभर्सिटी भिसा (डिभी) बाट पाउने पनि हुन्छ। रिफ्युजी (शरणार्थी) र असाइलम (आश्रय) को प्रक्रियाबाट ग्रीनकार्ड पाउने हुन्छ। अपराध पीडित र मानव तस्करीमा परेका पीडितले पाउने ग्रीनकार्ड हुन्छ। लगानीमा आधारित ग्रीनकार्ड पनि हुन्छ।
सामाजिक सञ्जालमा केही लेख्दा दुईपटक सोच्नुपर्यो। जथाभावी लेखेमा ग्रीनकार्ड नपाउने हुन्छ, पाएको खारेज हुन सक्छ। आपराधिक गतिविधिमा संलग्न भएको हुनु भएन। भएको छ भने उसको विगत र सबै पृष्ठभूमि समेत खोतल्न सक्छ।
अमेरिकामा हरेक व्यक्ति आर्थिक अनुशासनमा बसेको हुनुपर्छ। रोजगारीमा आधारित, परिवारमा आधारित र व्यवसायमा आधारित ग्रीनकार्ड पाउनेहरूले यो नियम मान्नै पर्छ। बायोमेट्रिकको सम्पूर्ण प्रक्रिया र मापदण्ड पूरा गरेको हुनपर्छ। व्यक्तिले आफ्नो कानूनी हैसियत बचाइराखेको हुनुपर्छ। विद्यार्थी हो भने उसले पनि नियम पालना गरेको हुनपर्छ।
अन्त्यमा म के भन्न चाहन्छु भने ग्रीनकार्ड, नागरिकता वा एसाइलम आवेदन गर्नेहरूले आफ्नो सामाजिक सञ्जालमा सही जनाकारी राख्नुपर्छ।
अमेरिकी अध्यागमन अधिकारीहरूले सोसल मिडियाका प्रोफाइलहरू समीक्षा गर्दैगर्दा आवेदनमा दिएको जानकारी र सोसल मिडियाको बीचमा अन्तर देखिएमा आवेदन अस्वीकृत हुने र कानुनी जटिलता निम्तिने हुन सक्छ।
सबै आवेदकहरूले आफ्नो सामाजिक सञ्जालका विवरणहरू पुनः समीक्षा गर्दा गलत वा भ्रामक जानकारी सच्याउनुपर्छ। आफ्ना सार्वजनिक पोस्टहरूमा सतर्क रहनुपर्छ।
सेतोपाटी ग्लोबलका अन्य सामग्री पढ्न यहाँ क्लिक गर्नुहोस्
ग्लोबल नेपालीबारे यो इमेलमा सम्पर्क गर्नुहोस्- setopatidebate@gmail.com
