ग्लोबल नेपाली
अमेरिकामा थुप्रै नेपालीहरू व्यापार–व्यवसाय गरिरहेका छन्। व्यापार–व्यवसायबाट मनग्य आम्दानी पनि गरिरहेका छन्।
यस्तैमध्ये एक हुन् अर्घाखाँचीमा जन्मिएका बाला घिमिरे।
बाला अमेरिका गएको २५ वर्ष भयो। उनले आफ्नै व्यवसाय थालेको भने सन् २०१३ देखि हो। अध्ययनको सिलसिलामा गएका उनी अहिले त्यहाँ रेस्टुरेन्ट चलाउँछन्।
'म त मास्टर्स गर्न भनेर आएको थिएँ। संघर्षका कुरा छाडौं। अहिले व्यवसाय गरिन्छ। यतै बसिएको छ,' बालाले सुनाए।
बालाले अमेरिकाको सिकागोमा 'नेपाल हाउस' र 'सिकागो करी हाउस' नामका चार वटा रेस्टुरेन्ट चलाइरहेका छन्। रेस्टुरेन्टमा नेपाली तथा भारतीय स्वादका खानेकुराहरू पाइन्छन्।
नेपाल हाउसमा नेपाली स्वादको मःम, छोइला, चाउमिन, समोसा, आलु पापडी चाट, आलुको अचार लगायत थुप्रै परिकार पाइन्छन्। त्यहाँ नेपाली खसीको मासुको स्वाद पनि लिन पाइने उनले बताए।
त्यस्तै सिकागो करी हाउसमा भारतीय स्वादका चिकेन मखनी, पालक पनिर, चिकेन तन्दुरी, नान, आलु र सिमीको तरकारी लगायत परिकार पाइन्छन्। खानेकुराको स्वादसँगै गुणस्तरमा पनि एकदमै ध्यान दिएको उनले बताए।
बालाको व्यापार रेस्टुरेन्ट र अनलाइन दुवै माध्यमबाट हुन्छ। उनका अनुसार नेपाली तथा भारतीय स्वादका खानेकुराहरू भए पनि सेवाग्राही अधिकांश अमेरिकन र अफ्रिकन छन्। उनीहरूले नेपाली स्वाद निकै मन पराएर खान्छन्।
'हाम्रा ९९ प्रतिशत सेवाग्राही अमेरिकन र अफ्रिकन नै हुनुहुन्छ। नेपाली स्वादका खानेकुराहरू यहाँका स्थानीयले पनि खुब मनपराउँछन्,' उनले थपे, 'व्यापार निकै राम्रो छ।'
उनका अनुसार रेस्टुरेन्टमा सरकारी अधिकारीहरू, राजनीतिज्ञदेखि सर्वसाधारणसम्म आउँछन्। बालाको रेस्टुरेन्टमा सबभन्दा प्रख्यात मःम हो। धेरैले मःम नै रूचाउँछन्।
नेपालबाट विभिन्न राजनीतिक दलका नेताहरू जाँदा पनि उनको रेस्टुरेन्ट पुग्ने उनले बताए। खासगरी सिकागो सहर पुग्दा अधिकांश नेताहरू आउने उनले बताए।
'सिकागो करी हाउसमा अहिलेका नेपालका राष्ट्रपति पनि आउनुभएको छ। उहाँले नै उद्घाटन गर्नुभएको हो,' बालाले भने, 'अहिलेका प्रधानमन्त्री एमाले अध्यक्ष केपी शर्मा ओली पनि यहाँ आउनुभएको थियो। सिकागो भ्रमणमा आउनुभएका प्रायः सबै नेताहरू यहाँ आउनु हुन्छ।'
बाला व्यवसायसँगै राजनीतिमा पनि रूचि राख्छन्। हाल प्रत्यक्ष रूपमा राजनीतिमा सक्रिय नरहे पनि अप्रत्यक्ष रूपमा राजनीतिसँग नजिक रहेको उनको भनाइ छ।
'पहिले म नेपालको राजनीतिमा सक्रिय थिएँ। अमेरिका आएर पनि कुनै पार्टीको जिम्मेवार पदमा काम गरिरहेको थिएँ। अहिले प्रत्यक्ष चाहिँ छैन,' उनले थपे।
उनी सामाजिक काममा पनि सक्रिय छन्। अमेरिकामा थुप्रै नेपालीहरूलाई सहयोग गरिरहेको उनले बताए। अमेरिकास्थित नेपाली दूतावासको कन्सुलर सेवामा समेत सहयोग पुर्याउँदै आएको उनी बताउँछन्।
अमेरिकामा दुई दशक बढी समय बिताइसकेका बालाले नेपाल फर्किने विषयमा भने सोचेका छैनन्।
भन्छन्, 'यहीँ काम गरिएको छ। छोराछोरी पढिरहेका छन्। तुरून्त नेपाल फर्किने सोच छैन।'
सेतोपाटी ग्लोबलका अन्य सामग्री पढ्न यहाँ क्लिक गर्नुहोस्
ग्लोबल नेपालीबारे यो इमेलमा सम्पर्क गर्नुहोस्- setopatidebate@gmail.com
