राष्ट्रिय स्वतन्त्र पार्टी (रास्वपा) का केन्द्रीय सदस्य मोहनबहादुर थापा अमेरिकी अध्यागमनको नियन्त्रणमा परेका छन्।
नेपालबाट अमेरिका जाने क्रममा थापालाई अमेरिकाको इमिग्रेसन एण्ड कस्टम्स इनफोर्समेन्ट(आइसिइ) ले फिलाडेल्फियामा नियन्त्रणमा लिएको हो। उनलाई के कारणले नियन्त्रणमा लिइएको हो भनेर विस्तृत रूपमा खुलाइएको छैन। तर अमेरिकाको अध्यागमन (आइसिई) को वेभसाइटमा उनी नियन्त्रणमा परेको सूचना राखिएको छ।
थापा रास्वपा सभापति रवि लामिछानेसँग निकट मानिन्छन्। २०७९ मा रास्वपाका तत्कालीन सांसद ढाकाकुमार श्रेष्ठलाई आर्थिक लेनदेनमा कारबाही गरेको बेला थापा पनि निलम्बनमा परेका थिए। तर उनको पछि कारबाही फुकुवा गरिएको थियो। श्रेष्ठले सभापति लामिछानेसँग निकट रहेका थापाले मन्त्री बनाउँछु भनेर आफूसँग तीन करोड रूपैयाँ मागेको बताएका थिए।
रास्वपाका सहप्रवक्ता मनिष झाले मोहनजंग थापा अध्यागमनको नियन्त्रणमा परेको जानकारी आएको बताए। उनले थापा केन्द्रीय सदस्य भएको स्वीकार गर्दै भनाइ सार्वजनिक गरेका छन्।
‘रास्वपाका केन्द्रीय सदस्य मोहन थापा अमेरिकन इमिग्रेसनको हिरासतमा पर्नुभएको जानकारीमा आएको छ,’ उनले भनेका छन्।
झाले केन्द्री सदस्य थापा केही व्यक्तिगत तथा कानुनी प्रक्रिया स्पष्ट र समाधान गर्नुछ भन्दै किनारा नलागेसम्म जिम्मेवारीबाट बाहिर रहन निवेदन दिएको पनि बताएका छन्।
‘मोहन थापाजीले यस अगाडि नै आफूले केही व्यक्तिगत कानुनी प्रक्रियाहरू स्पष्ट र समाधान गर्नु छ र सो किनारा नलागेसम्मको लागि आफू केन्द्रीय सदस्यको जिम्मेवारीबाट बाहिर रहन निवेदन दिएर जानुभएको थियो,’ झाले बताए।
झाले उनी केन्द्रीय सदस्यको जिम्मेवारीमा नरहेको बताए पनि पार्टीका बैठकमा भने उपस्थित हुँदै आएको रास्वपाका नेताहरू बताउँछन्।
स्रोतका अनुसार थापालाई यसअघि पनि अमेरिकामा मानव बेचबिखनको मुद्दा लागेको थियो। त्यो मुद्दामा उनी जेल समेत परेका थिए।
अहिले पनि कुनै गम्भीर अपराधमा मुछिएर पक्राउ परेको हुनसक्ने अध्यागमन कानुनका जानकारको भनाइ छ।
