गायन रियालिटी सो 'द भ्वाइस अफ नेपाल' का विजेता किरण गजमेरलाई अन्तर्राष्ट्रिय नेपाली साहित्य समाजले बोर्ड अफ ट्रष्टी सदस्यता प्रदान गरेको छ।
विदेशमा रहेर किरणले नेपाली गीत संगीतको क्षेत्रमा पुर्याएको योगदानको उच्च मूल्याङ्कन गर्दै उक्त सदस्यता प्रदान गरिएको हो।
अनेसास वर्तमान विधान वमोजिम ट्रष्टीको सदस्यता शुल्क एक हजार अमेरिकी डलर छ। उक्त रकम एरिजोना निवासी अनेसास ट्रष्टीका सल्लाहकार रोहिणी शर्माले प्रायोजन गरेका छन्। शर्माले किरणको गायन क्षमता, स्वर, कला र विदेशमा बसेर पनि नेपाली गीत संगीतमा उनको योगदानको उच्च प्रशंसा गरेका छन्।
अनेसासले किरण गजमेरजस्ता युवा गायकलाई ट्रष्टीको सदस्यता प्रदान गर्न पाएकोमा हर्ष लागेको बताउँदै ट्रस्टीका सभापति गीता खत्रीले भनिन्, ‘किरणजस्ता कला, संगीत, गायनमा ख्याती प्राप्त युवालाई अनेसासमा समेट्न पाएकोमा गौरव महसुस भएको छ।’
यसैगरी अनेसासका केन्द्रीय अध्यक्ष प्रकाश पौडेल माइलाले प्रवासमा रहेर नेपाली संगीतको सेवामा समर्पित किरणको सांगीतिक लगावले युवापुस्तालाई प्रेरणा दिने बताए।
बिओटी उपसभापति पदम विश्वकर्माले किरणजस्ता युवाको सहभागितामा अनेसासले नेपाली भाषा, साहित्य र कलालाई विश्वरङ्गमञ्चमा फैल्याउन सहयोग पुग्ने बताए।
अनेसासका वरिष्ठ उपाध्यक्ष गोवर्द्धन पूजाले पनि अनेसासमा किरणको आवद्दतालाई स्वागत गर्दै नेपाली वाङ्मयको विविध विधाको प्रवर्धनमा लागेको अनेसासलाई थप रङ् मिलेको बताए।
