स्थानीय तह निर्वाचन २०७९ को मतपरिणाम आउने क्रम जारी छ।
मंगलबार दिउँसो साढे ४ बजेसम्म निर्वाचन आयोगको प्रणालीमा प्रविष्ट भएअनुसार ३ महानगर, १० उपमहानगरसहित ७३९ स्थानीय तहको अन्तिम मत परिणाम सार्वजनिक भएको छ।
३ महानगरपालिका, १ उपमहानगरपालिकासहित १४ पालिकाको अन्तिम परिणाम आउन बाँकी छ। २ वटा पालिकाको मतगणना अझै सुरू भएको छैन।
सार्वजनिक विवरणअनुसार नेपाली कांग्रेसले पालिका प्रमुखदेखि सदस्यसम्म सबैभन्दा बढी पालिकामा जित हात पारेको छ।
दोस्रोमा नेकपा एमाले छ भने तेस्रोमा नेकपा माओवादी केन्द्र छ।
अब आउन बाँकी रहेको पालिकामा प्रदेश १ बाट उदयपुरका दुई वटा पालिका, मधेश प्रदेशबाट रौतहटका ३, बाराबाट १ पालिकाको अन्तिम नतिजा आउन बाँकी छ।
यस्तै बागमती प्रदेशबाट काठमाडौं महानगरपालिका र ललितपुर महानगरपालिकाको अन्तिम परिणाम आउन बाँकी छ।
यस्तै गण्डकीबाट पोखरा महानगरपालिका बाँकी हुँदा लुम्बिनीबाट दाङको तुलसीपुर उपमहानगरपालिका, रूपन्देहीको तिलोत्तमा नगरपालिका र कपिलबस्तुको महाराजगन्ज नगरपालिकामा अन्तिम परिणाम आउन बाँकी छ।
यस्तै सुदूर पश्चिम प्रदेशबाट बाजुराको बुढीगंगाको अन्तिम परिणाम आउन बाँकी छ।
बाँकी रहेका १४ मध्ये उदयपुरको त्रियुगा र बाजुराको बुढीगंगा नगरपालिकामा विवादका कारण मतगणना सुरू हुन सकेको छैन। बाँकी १२ वटा पालिकामा भइरहेको छ। गणना अनुसार नेपाली कांग्रेसले ५, नेकपा एमालेले ३ पालिकामा अग्रता लिइरहेका छन्।
जनता समाजवादी पार्टी, एकीकृत समाजवादी, लोसपा र स्वतन्त्रले एक-एक पालिकामा अग्रता लिएका छन्।
यी हुन अब नतिजा आउन बाँकी रहेका पालिकाहरू
- नेकपा एमाले-३
- नेपाली कांग्रेस-५
- जसपा- १
- एकीकृत समाजवादी-१
- लोसपा- १
- स्वतन्त्र-१
- गणना हुन बाँकी -२
जिल्ला | पालिका | कैफियत |
|---|
उदयपुर | कटारी नगरपालिका | नेपाली कांग्रेसको अग्रता |
उदयपुर | त्रियुगा नगरपालिका | गणना हुन बाँकी |
रौतहट | गढीमाई नगरपालिका | जसपाको अग्रता |
रौतहट | गरूडा नगरपालिका | नेकपा एमालेको अग्रता |
रौतहट | फतुवा विजयपुर नगरपालिका | माओवादी केन्द्रको अग्रता |
बारा | पचरौता नगरपालिका | लोसपाको अग्रता |
काठमाडौं | काठमाडौं महानगरपालिका | स्वतन्त्र उम्मेदवारको अग्रता |
ललितपुर | ललितपुर महानगरपालिका | नेपाली कांग्रेसको अग्रता |
कास्की | पोखरा महानगरपालिका | एकीकृत समाजवादीको अग्रता |
रुपन्देही | तिलोत्तमा नगरपालिका | नेपाली कांग्रेसको अग्रता |
कपिलवस्तु | महाराजगञ्ज नगरपालिका | नेपाली कांग्रेसको अग्रता |
दाङ | तुलसीपुर उपमहानगरपालिका | नेकपा एमालेको अग्रता |
बाजुरा | बुढीगंगा नगरपालिका | गणना हुन बाँकी |
