डा. चित्र माबोको पुस्तक ‘डोलीभर्ना’मा आधारित नाटक मुक्कुमलुङ (विश्वासको शक्ति) असोज २ गतेदेखि प्रदर्शनी हुने भएको छ।
काठमाडौंको बत्तीसपुतलीस्थित शिल्पी थियटरमा बुधबारदेखि साउन २० गतेसम्म नाटक प्रदर्शन हुने भएको हो। नाटक मंगलबार बाहेकका दिनमा प्रदर्शन हुनेछ।
राजन मुकारुङले परिकल्पना तथा नाट्य रुपान्तरण गरेको मुक्कुमलुङलाई रंगकर्मी पवित्रा राईले निर्देशन गरेकी हुन्। स्रोत व्यक्तिका रुपमा यासेली योङहाङ, स्वप्निल स्मृति र मधु केरुङ ‘केवाफुङ’ छन्।
नाटकमा रेयर राई, दिपा सुहाङ, नुसा लिङदेन, प्रमिला राई, प्रायस वान्तवा राई, शायोक मुकारुङ, दिवस पयांगु, उदय बेघा लिम्बु, युवाहाङ राई, स्मृति कुलमर, उज्वल वान्तवा राई, लहना राई, सुजु सुनुवार, रमिला मोक्तान, आकाश नेपाली, इन्दिरा नेम्वाङ, गोविन्द लिम्बु, हिरन राई लगायतका कलाकारहरुले अभिनय गरेका छन्।
नाटकमा संजित थुलुङले म्युजिक डिजाइन, मणि किरातीले सेट डिजाइन र सन्जिव योगीले लाइट डिजाइन गरेका छन्।
ताप्लेजुङको सिरीजंघा गाउँपालिकाको उपाध्यक्ष समेत रहनुभएका डा. चित्र माबोको कथासंग्रह डोलीभर्ना केही समयअघि बजारमा आएको थियो।
पूर्वी पहाडी क्षेत्रको जनजीवन, त्यस बसोबास गर्ने लिम्बू समाजको मुन्धुमी संस्कृति र अन्य समसामयिक विषयहरुमा लेखिएका १५ वटा कथाहरु डोलीभर्नामा संग्रहित छ।
मुक्कुमलुङलाई आदिवासी लिम्बू जातिले आफ्नो पवित्र आस्था केन्द्र एवम् मुन्धुमी थलोका रुपमा मान्ने गर्छन् जुन क्षेत्र अहिले पाथीभराका नामले प्रसिद्ध छ।
पछिल्लो समय निजी क्षेत्रको कम्पनीले त्यहाँ केबलकार बनाउने परियोजना अघि बढाउन खोजेपछि त्यसको चर्को विरोध भइरहेको छ।
