आगामी वैशाख २६ गतेदेखि देशव्यापी प्रदर्शनमा आउने नेपाली फिल्म 'ऊनको स्वीटर' का गीत निर्देशकसमेत रहेका चर्चित गायक सुजन चापागाईं फिल्मका प्रमुख कलाकारहरूसहित देशभरका दर्शकहरूसँग प्रत्यक्ष भेटघाट तथा सांगीतिक कार्यक्रममार्फत संवादमा उत्रने भएका छन्।
'ऊनको स्वीटर साँझ विथ सुजन चापागाईं' शीर्षकमा पोखरा र धरानमा विशेष कार्यक्रम आयोजना गरिने भएको छ। सुजनसँगै फिल्मका प्रमुख कलाकार विपीन कार्की, मिरूना मगर, परीक्षा लिम्बु, एलेक्स पारस, विल्सम विक्रम राई र निर्देशक नवीन चौहानको विशेष उपस्थिति रहनेछ।
पोखराको लेकसाइडस्थित हल्लन चोकमा आज अपराह्न ४ बजेबाट सुरू हुने कार्यक्रम 'ऊनको स्वीटर साँझ' प्रचार नेपाल, पोखराको व्यवस्थापनमा आयोजना हुँदैछ। उक्त कार्यक्रममा गुरुङ समूहले 'मखमली' गीतमा र फिल्मका कलाकारहरू एलेक्स पारस र परीक्षा लिम्बुले 'काफ्ले' गीतमा नृत्य प्रस्तुति दिनेछन् भने सुजन चापागाईंले 'फूल' गीतमा एकल प्रस्तुति दिनेछन्। त्यस्तै झलकमान गन्धर्वको जन्म जयन्तीको अवसर पारेर गन्धर्वको परिवारको उपस्थितिमा सुजनले झलकमानका गीतमार्फत श्रद्धाञ्जली अर्पण गर्ने कार्यक्रम पनि समावेश छ।
त्यसैगरी धरानको रंगशालामा वैशाख १८ गते साँझ ५ बजे आयोजना हुने कार्यक्रम 'ऊनको स्वीटर साँझ विथ सुजन चापागाईं' लाई सुजनको 'द इन्फिनिटी ब्यान्ड' ले साथ दिनेछ। कार्यक्रममा 'काफ्ले' गीतकी गायिका झुमा लिम्बु र चर्चित गायिका सुनिता थेगिमको पनि विशेष प्रस्तुति रहनेछ।
हालै सार्वजनिक भएको यस फिल्मको गीत 'काफ्ले' सामाजिक सञ्जालमा निकै चर्चामा छ। यसअघि सार्वजनिक भएका 'फूल' र 'मखमली' गीतले पनि राम्रो लोकप्रियता कमाएका छन्।
फिल्मको ट्रेलर सार्वजनिक भने काठमाडौंमा वैशाख १६ गते साँझ ४ बजे गरिने तयारी छ।
1684429059.jpg)
