अहिलेका चर्चित कलाकार दुर्गेश थापाले काठमाडौंमा आगामी साता लाइभ कन्सर्ट गर्दैछन्।
वैशाख १८ गते बिहीबार हायात ग्राउन्ड बौद्धमा दुर्गेश थापा लाइभ कन्सर्ट हुन लागेको हो।
देश–विदेशका स्टेज कार्यक्रममा धेरै खोजिने दुर्गेशले काठमाडौंमा पहिलोपटक भव्य कन्सर्ट गर्न लागेका हुन्। ट्राइएङल इन्कले यो कन्सर्टको आयोजना गरेको हो।
कन्सर्टको तयारी तिव्र भइरहेको आयोजक संस्था ट्राइएङल इन्कका प्रमुख कार्यकारी आशिष दाहालले बताए। 'सबै हिसाबले स्तरीय र भव्य हुनेगरी तयारी गरिरहेका छौं,' उनले भने।
उनका अनुसार उक्त कन्सर्टमा दुर्गेशसँगै अन्य थुप्रै चर्चित कलाकारहरूको पनि प्रस्तुति रहनेछ। जेन जी पुस्ताका कलाकारहरू पनि सामेल हुनेछन्। 'एक/दुई दिनमा अन्य कलाकारहरूको लाइनअप सार्वजनिक गछौं,' आयोजक संस्थाका प्रमुख कार्यकारी दाहालले भने।
आयोजक संस्थाले खल्ती र आइएमई पेसँग सहकार्य गर्दै कन्सर्टको अनलाइन टिकट बिक्री गरिसकेको छ। अहिलेका लागि ५ सय, ७ सय र १ हजार रूपैयाँ मूल्यमा टिकटहरू बिक्री भइरहेको छ। टिकटदर आगामी दिनमा केही बृद्धि समेत हुनसक्ने आयोजकले जनाएको छ।
दुर्गेश स्टेज पर्फमरका रूपमा चर्चित छन्। उनले यो कन्सर्टमा पनि डान्सरसहित प्रस्तुति दिनेछन्। दुर्गेशको पछिल्लो गीत ‘दुश्मन हेरेको हेर्यै’ स्रोता दर्शकमाझ अहिले निकै चर्चामा छ।
