गायक प्रमोद खरेल अचेल एकल गायनभन्दा बढी ब्यान्डसँग गाउँछन्।
उनको 'प्रमोद खरेल एन्ड परम्परा' ब्यान्डले देश–विदेशमा थुप्रै प्रस्तुति दिइसकेको छ।
यतिबेला पनि प्रमोदले ब्यान्डसहित नेपालका विभिन्न जिल्लामा कन्सर्ट गरिरहेका छन्। गत शनिबार मोरङमा 'प्रमोद खरेल एन्ड परम्परा' को कन्सर्ट ऐतिहासिक रह्यो। विराटचोकमा आयोजित विराट एक्स्पोमा शनिबार साँझ हजारौं दर्शकमाझ प्रमोदले ब्यान्डसहित प्रस्तुति दिए।
कन्सर्टका प्राप्त तस्बिरमा दर्शकको खचाखच भीड देख्न सकिन्छ। आयोजकका अनुसार उक्त दिन १५ हजार हाराहारी दर्शकको सहभागिता रह्यो। दर्शक २ घन्टा लगातार ब्यान्डको प्रस्तुतिमा झुमे।
'सो दिन १५ हजार भन्दा बढी दर्शकको उपस्थिति रहेको आयोजकले बताउनुभएको छ। सो भीड विराट एक्स्पोमा सबैभन्दा ठूलो भीड समेत हो,' सेतोपाटीसँग प्रमोदले भने।
ब्यान्डले बुधबार महाशिवरात्रिको अवसरमा काठमाडौं चुनीखेलमा प्रस्तुति दिने तयारी छ।
फागुन २ देखि नेपाल टुरमा निस्किएको ब्याण्डले कामाठाडौंको कार्यक्रमपछि भने केही समय कन्सर्टबाट बिश्राम लिनेछ।
'त्यसपछि नयाँ गीत ल्याउँनेछौं। गीत रिलिजपछि मात्र कन्सर्टलाई निरन्तरता दिन्छौं,' प्रमोदले भने।
प्रमोदले दुई साताअघि 'लैलैलै' बोलको डान्सिङ गीत समेत सार्वजनिक गरेका थिए।
यो गीतले युट्युबमा १० लाखभन्दा बढी भ्युज पाइसकेको छ।
तस्बिरः प्रमोद खरेलबाट
