गायक विमलराज क्षेत्रीले देशभर सांगीतिक कार्यक्रम गर्ने भएका छन्।
'विमलराज क्षेत्री लोकतान्त्रिक सांस्कृतिक अभियान' नाम दिइएको कार्यक्रम नेपाली कांग्रेस निकट नेपाल सांस्कृतिक महासंघको आयोजनामा हुने भएको हो।
काठमाडौंमा आयोजित एक कार्यक्रमकाबीच सांस्कृतिक अभियानबारे जानकारी दिइएको छ।
कार्यक्रममा सांस्कृतिक महासंघका अध्यक्ष तीर्थ बहादुर थापाले नेपाली कांग्रेसले गरेका क्रियाकलाप, उपलब्धि, सामाजिक रूपान्तरका महत्वपूर्ण घटनाहरू र भावी योजना देशभरका जनतासमक्ष पुर्याउन 'विमलराज क्षेत्री लोकतान्त्रिक सांस्कृतिक अभियान' गर्न लागिएको बताए।
महासंघका महामन्त्री कलाकार शिवशंकर रिजाल 'जोगिन्दर' ले नेपाली कांग्रेसले कलाकर्मीलाई सधै माया गरेर साथमा लिएर हिँड्दै आएको बताउँदै नेपाली जनतामाझ कांग्रेसलाई अझ नजिकबाट चिनाउन विमलराज क्षेत्री लोकतान्त्रिक अभियान महत्वपूर्ण हुने चर्चा गरे।
आयोजित कार्यक्रममा नेपाली कांग्रेस महाधिवेशन सदस्य प्रभातमणी ओझा, नेपाल सांस्कृतिक महासंघकी कोषाध्यक्ष राधिका हमाल, महासंघको बागमती प्रदेश अध्यक्ष राजेन्द्र खत्री, कलाकार प्रभाकर देव शर्मा, मनोज केसी, सुनिल पुरी लगायतको उपस्थिति थियो।
कार्यक्रममा गायक विमलराज क्षेत्रीले 'विमलराज क्षेत्री लोकतान्त्रिक अभियान' आफूले सानैदेखि देखेको सपना भएको भन्दै अहिले आएर पूरा हुन लागेको बताए।
अभियानमा नेपाली कांग्रेसविशेष सहित जनताका सुखदुखका गीतहरू समेत गाउने उनले जानकारी दिए।
'यो लोकतान्त्रिक सांस्कृतिक अभियानले नेपाली जनतालाई कांग्रेससँग अझ नजिकसँग जोड्छ भन्ने विश्वास लिएको छु,' उनले थपे।
यही माघ २४ गते नेपाली कांग्रेसको केन्द्रीय कार्यलय सानेपामा नेपाली कांग्रेसका सभापति तथा पूर्व प्रधानमन्त्री शेरबहादुर देउवाबाट समुद्घाटन सहित कार्यक्रमको सुरूवात हुने जनाइएको छ। कार्यक्रम पहिलो चरणमा सातै प्रदेशका एक–एक जिल्लामा हुनेछ। त्यसपछि अन्य जिल्लामा कार्यक्रम हुने जनाइएको छ।
कार्यक्रममा विमलराज क्षेत्रीलाई गायनमा लोक गायिका राधिका हमालले साथ दिनेछिन्। कार्यक्रममा कलाकार शिवशंकर रिजाल, सुजाना केसी, शिवहरी बैरागी, प्रभाकर शर्मा, ऋतु थापा, संन्ध्या सानु, शशी थापा पुन, विष्णु धामी, उमाशंकर जोशी, टिका कुमारी क्षेत्री लगायतको समेत विभिन्न सांगीतिक प्रस्तुति रहने जनाइएको छ।
विमलराज क्षेत्रीले दर्जनौं गीतमा स्वर दिएका छन्। जसमध्ये 'जापान टोकियो', 'मधु वनैमा', 'सुपारी चाम्रो', 'औठी स्वयम्बरको', 'बल्लै भो भेट', 'बुट्टे रूमाल' जस्ता थुप्रै गीत हिट छन्।
