चर्चित गायक सुशान्त केसी भक्तपुरमा गुञ्जिने भएका छन्।
आउँदो मार्च ८ (फागुन २४) मा भक्तपुरको सल्लाघारी मैदानमा उनको कन्सर्ट हुने पक्का भएको हो।
उनले करिब साढे दुई वर्षपछि नेपालमा आफ्नो प्रस्तुति दिन लागेका हुन्। आइतबार ललितपुरमा पत्रकार सम्मेलन गर्दै उनको कन्सर्टबारे औपचारिक जानकारी दिइएको हो।
आयोजित पत्रकार सम्मेलनमा बोल्दै गायक केसीले लामो समयपछि काठमाडौं उपत्यकामा हुन लागेको कन्सर्टलाई लिएर उत्साहित रहेको बताए। उनले भने, 'समर्थकहरूको माया मेरो प्रेरणा हो र मार्च ८ मा सबैलाई संगीतको यो यात्रामा सहभागी गराउन उत्साहित छु।'
'बार्दली, सारङ्गी, साथी, आमा' जस्ता हिट गीतका लागि चर्चित सुशान्तले कन्सर्टमा पुराना हिट गीतहरूसँगै नयाँ सिर्जनाहरू पनि प्रस्तुत गर्नेछन्। सुशान्तका अनुसार दर्शकले सो अवसरमा नयाँ एक ट्रयाक समेत सुन्न पाउनेछन्। यो कन्सर्टकै लागि भनेर गीत तयार गरिरहेको उनले बताए।
कन्सर्टका लागि टिकट मूल्य साधारण ९९०, फ्यानपिट १४९९ र भीआइपीतर्फको २४९९ रूपैयाँ तोकिएको छ। टिकट खल्ती एपमार्फत खरिद गर्न सकिने जनाइएको छ। खल्ती एपले आइतबारदेखि नै टिकट बिक्री सुरु भइसकेको जनाएको छ।
आयोजकले टिकटको माग उच्च रहने अपेक्षा गर्दै समयमै बुकिङ गर्न आग्रह गरेका छन्।
कन्सर्टमा करिब १५ हजार दर्शक उपस्थित हुने आयोजकको अपेक्षा छ। एसकेसी इंक र द रोयल नेपाल इभेन्ट्सको संयुक्त आयोजनामा कन्सर्ट हुन लागेको हो।
कन्सर्टको सुरक्षा प्रबन्ध चुस्त बनाउन स्थानीय प्रशासनसँग समन्वय गरिएको आयोजकले जनाएको छ।
