रामबाबु गुरुङ निर्देशित फिल्म 'डिग्री माइला' को पहिलो गीत सार्वजनिक गरिएको छ।
शुक्रबार बाँसुरी फिल्म्स युट्युब च्यानलमार्फत फिल्ममा समावेश 'सुस्त सुस्त' बोलको गीत सार्वजनिक गरिएको हो। एसडी योगी र विज्ञानी पराजुलीको स्वर रहेको गीतको भिडिओमा अभिनेता दयाहाङ राई र अभिनेत्री आँचल शर्मालाई देख्न सकिन्छ।
दिल्लु चाम्लागाईंको शब्द रहेको गीतमा एसडी योगीले संगीत भरेका छन्। गीतमा रिकेश गुरुङको संगीत संयोजन छ।
फिल्मले थर्ड डिभिजनमा मास्टर डिग्री पास गरेका एक शैक्षिक बेरोजगारको कथा भन्छ। यही नाममाथि अभिनेता दयाको निर्देशनमा केही वर्षअगाडि नाटकसमेत प्रदर्शन भइसकेको छ। सोही नाटकलाई फिल्मका रूपमा पर्दामा प्रस्तुत गर्न लागेको हो।
फिल्ममा दयाहाङ राई, आँचल शर्मा, विजय बराल, माओत्से गुरुङ, बुद्धि तामाङ, प्रकाश घिमिरे, कमलमणी नेपाल, शेखर चापागाईं, सोमनाथ खनाल, पशुपति राईलगायत कलाकारको अभिनय छ।
बाँसुरी फिल्म्स र कबड्डी फिल्म्सले फिल्म निर्माणका लागि सुस्मा फिल्म्ससँग सहकार्य गरेको छ। शिवराम श्रेष्ठ र राइली एच शेनले छायांकन गरेको फिल्मलाई निमेश श्रेष्ठले सम्पादन गरेका हुन्।
यो फिल्म २०८१ को नयाँ वर्षमा रिलिज हुनेछ।
