गुड फ्राइडे सिनेमा
बंगाली मूलकी अपर्णा सेन राष्ट्रिय तथा अन्तर्राष्ट्रिय स्तरमा ख्याती प्राप्त भारतीय निर्देशक तथा अभिनेत्री हुन्। आफ्नो करिअरको सुरूआती काम नै सत्यजीत राय निर्देशित 'तीन कन्या' बाट गरेकी उनले निर्देशक मृणाल सेनका फिल्महरूमा अभिनय गरेकी छन्। सफल, मुख्यतः बंगला र केही हिन्दी भाषाका फिल्ममा अभिनय गरेकी अर्पणा सौमित्र चटर्जी र उत्तम कुमारजस्ता कलाकारका जोडीका रूपमा रुचाइएकी अभिनेत्री हुन्।
अभिनेत्रीका रूपमा स्थापित उनले करिब ३६ वर्षको उमेरमा आफ्नो निर्देशनमा '३६ चौरंगी लेन' फिल्म बनाइन्। यो फिल्मबाट राष्ट्रिय पुरस्कार जितेपछि उनको चर्चा थप चुलियो।
महिला तथा सामाजिक विषयमा फिल्म बनाउने उनको लेखन तथा निर्देशनमा 'पारोमिटर एक दिन', 'युगान्त', ''पारोमा, 'मिस्टर एन्ड मिसेस अय्यर' लगायत फिल्म चर्चित छन्।
कयौं राष्ट्रिय तथा अन्तर्राष्ट्रिय पुरस्कार जितेकी अपर्णाका फिल्मका मुख्य पात्रहरू शिक्षित र बौद्धिक हुन्छन्। उनका फिल्मका मुख्य महिला पात्रहरू स्वतन्त्र र सक्षम देखिन्छन्। उनका फिल्मका पात्र र परिवेशमा पनि उनी जन्मे-हुर्केको बंगाल क्षेत्रकै बाहुल्य छ।
उनी उच्च मध्यम वर्गीय परिवारका महिला पात्रका जीवनका सूक्ष्म पक्षहरू उजागर गर्ने मामिलामा सचेत निर्देशक हुन्। अपर्णा सशक्त अभिनेत्री कोनकोना सेनकी आमा हुन्।
आज गुड फ्राइडे सिनेमामा हामीले उनै अपर्णाको फिल्म 'द जापानिज वाइफ' सिफारिस गरेका छौं।
भिडिओ च्याट, एआईको आजको समयको आँखाले हेर्दा द जापानिज वाइफको कथा पुरानो लाग्छ। फिल्मका दुई मुख्य पात्र ब्रगाली स्नेहमोय र जापानी मियागे पत्र मार्फत जोडिएका छन्।
यी दुई यस्ता पात्र हुन्, जसले पत्रकै माध्यमबाट बिहे गर्छन्। जीवनमा एक पटक पनि भेट्दै नभेटी।
यति मात्रै कहाँ हो र, बिहे भएको पन्ध्र वर्षभन्दा बढी बितिसक्दा पनि उनीहरूको भेट भएको हुँदैन। प्रेमको बेग्लै खालको कथा बोकेको यो फिल्मको कथा अकल्पनीय जस्तै छ। तर यसको प्रस्तुतिले यसलाई विश्वसनीय बनाइदिएको छ।
भेट नभए पनि यी दुई पात्र एक अर्कासँग हरेक कुरा साट्छन्। उनीहरूको परिवार, परिवेश र स्वास्थ्य हरेक कुराको खबर एकअर्कालाई हुन्छ। अझ, दुवैले पत्रमा आफ्नो देशको प्रकृति र संस्कृतिबारे पनि धेरै कुरा बुझाउँछन्।
फरक भूगोलमा बाँच्ने स्नेहमोय र मियागे कसरी जोडिन्छन्? कसरी प्रेममा पर्छन्? बिहे भएपछि पनि धेरै वर्ष भेट नभएको वास्तविक जीवनमा भेट होला वा नहोला? भए कहिले होला? यिनै प्रश्नका साथमा यो फिल्म हेर्नुभयो भने पक्कै रमाइलो लाग्नेछ।
फिल्ममा यी दुई पात्र नजिक हुने क्रममा आउने भाषा र दुरीको समस्याका अनेक सन्दर्भ आउँछन्। केहीले रमाइलो महसुस गराउँछ, केही घटनाले दुखी पनि बनाउँछ।
यी दुई पात्रको नामले उपहार र आशक्ति अर्थ बोकेको छ। वास्तवमा यो फिल्ममा प्रेमलाई त्यही उपहार र आशक्तिका रूपमा देखाइएको छ।
आदर्श प्रेमको एउटा सुन्दर कोलाजजस्तो यो फिल्म लेखक कुणाल बसुको कथामा आधारित छ। फिल्ममा राहुल बोसले शिक्षक स्नेहमोय र जापानी युवती मियागेको भूमिका चिगुसा ताकाकुले निर्वाह गरेका छन्।
राइमा सेन र मौसमी चटर्जीको पनि महत्वपूर्ण भूमिका छ।
अपर्णा सेनका धेरै फिल्ममा अभिनय गरेका राहुल बोसको यो फिल्ममा विशेष जमेका छन्। निर्देशन, कथा र सिनेमाटोग्राफीले स्टार इन्टरटेनमेन्ट अवार्ड पाएको थियो।
