गुड फ्राइडे सिनेमा
यो कथामा चार जना साथीहरू छन्। उनीहरू भारत, तमिलनाडुको त्रिची सहर नजिकको एउटा इन्जिनियरिङ कलेजमा पढ्छन्।
लेनिन विजय, सुरेश, अखिल र कार्थी अन्तिम वर्षका विद्यार्थी हुन्। उनीहरूको जीवन मस्तीमा बितिरहेको हुन्छ। पढाइभन्दा बढी बाहिरी दुनियाँमा व्यस्त छन्। झगडा, रमाइलो र बिद्रोहको भावना उनीहरूको जीवनशैली बनेको छ।
कलेज नजिकैको एउटा ढावा उनीहरूको नियमित जमघट गर्ने ठाउँ हो। त्यो ढावा कुमार नामका व्यक्तिले चलाउँछन्। उनी आफ्नो जातमा आधारित राजनीतिक पार्टी खोल्न चाहन्छन्। त्यसका लागि उनले सामाजिक अस्थिरता र युवाहरूको आक्रोशलाई हतियार बनाउन खोजिरहेका हुन्छन्।
एक रात ढावामा एक स्थानीयको समूहले विद्यार्थीहरूलाई आक्रमण गर्छ। त्यही बेलामा कार्थीले रमनाथन नामका एक विद्यार्थीले लेनिनकी पूर्वप्रेमिका एग्नेसलाई दुर्व्यवहार गरिरहेको देख्छन्। कार्थीले रमनाथनलाई कुटपिट गर्छन् र घटनाबारे लेनिनलाई सुनाउँछन्।
रमनाथन एग्नेसलाई आफ्नो बनाउन चाहन्छन्। कार्थीले कुटेपछि अब रमनाथन बदला लिन खोज्छन्। उनले आफ्ना साथीहरूसँग मिलेर कार्थीलाई आक्रमण गर्ने योजना बनाउँछन्। यी सबै घटनाक्रमहरू ढावा र कुमारको राजनीतिक योजना वरिपरि घुम्न थाल्छन्।
यसैबीच कुमार आफ्ना काकासँग मिलेर राजनीतिमा सक्रिय हुन्छन्। युवाहरूको आवेग, वर्गीय आक्रोश र जातीय मनोविज्ञान बुझेर त्यसलाई आफ्नो पार्टीको सुरूआतका लागि प्रयोग गर्न थाल्छन्।
एक रात चार साथीहरू बसेर अत्यधिक मदिरा पिउँछन्। कट्टरपन्थीहरूसँग उनीहरूको हिंसात्मक झगडा हुन्छ। कुमार र उनका काकाले यो स्थितिलाई राजनीतिक रूपमा प्रयोग गर्न खोज्छन्।
यी सबैलाई के चाहिँ थाहा हुँदैन भने उनीहरू सबै एउटै ठूलो राजनीतिक खेलका मोहरा बनिरहेका हुन्छन्। चार विद्यार्थी, कुमार र उनका राजनीतिक योजना र रमनाथनको बदला — यी सबै एकै ठाउँमा जुधेपछि के हुन्छ?
आखिर यी सबै पात्रहरूबीच के सम्बन्ध हुन्छ?
हिंसा, बदला, मित्रता र राजनीतिक षड्यन्त्रको घनचक्करमा परेका यी युवाहरूले सबै कुरा थाहा पाउँदासम्म के होला?
यसका लागि तमिल फिल्म 'उरियाडी' हेर्नुहोला।
उरियाडीले विद्यार्थी जीवनको कथा त भन्छ नै, जातीय राजनीतिले कसरी निर्दोष जनतालाई प्रयोग गर्छ भन्ने कुरा पनि देखाउँछ। निर्देशक विजय कुमारले कुनै ग्ल्यामर, हास्य या नाटकीय प्रेम कहानीबिनै फिल्ममा यथार्थ, आक्रोश र विद्रोह सजीव ढंगले उतारेका छन्।
सन् २०१६ मा रिलिज भएको यो फिल्मको समीक्षकहरूले एकदमै प्रशंसा गरे। फिल्ममा मुख्य भूमिका समेत निर्वाह गरेका निर्देशक विजय कुमारलाई एक सशक्त र साहसी फिल्म बनाउने निर्देशक भनियो। यो उनको पहिलो निर्देशन थियो।
उरियाडी एक स्वतन्त्र फिल्म भएकाले यो मूलधारका पुरस्कारहरूबाट बञ्चित भयो। तर यसलाई हिन्दुस्तान टाइम्सले सन् २०१६ को उत्कृष्ट १० फिल्ममा राखेको थियो। त्यस्तै दक्षिण भारतीय फिल्महरूका विभिन्न ९ वटा अवार्ड जितेको थियो।
फिल्म सफल भएकैले विजय कुमारले यसको सिक्वेल 'उरियाडी-२' बनाएका थिए।