देश-विदेशका स्टेज कार्यक्रममा सर्वाधिक खोजिएका गायकमध्ये पर्छन् प्रमोद खरेल।
कहिले गीत, कहिले कन्सर्ट त कहिले रियालिटी शोबाट उनी स्रोता-दर्शकसँग जोडिइरहे र मन जितिरहे। तर धेरैलाई थाहा नहोला, सांगीतिक क्षेत्रबाट नाम-दाम कमाएका प्रमोदको सुरूआती सपना गायक बन्ने थिएन।
एसएलसी सकेर झापाको बनीयानी गाउँबाट रात्रिबास चढेर काठमाडौं आउँदै गर्दासम्म उनले गायक बन्छु भन्ने सोचेका थिएनन्। गाउन त उनी बच्चैदेखि गाउँथे। स्वर खिपेर खुब मीठो गरी गाउँथे। तर उनले गाउँछन् भन्ने टोल-छिमेक, स्कुलका साथीभाइ र शिक्षक कसैलाई थाहा थिएन। किनभने, अन्तरमुखी स्वभावका प्रमोद आफ्नै घरभित्र मात्र गाउँथे।
'मैले स्कुलमा कहिल्यै गीत गाइनँ। आमाबुबा दुवै शिक्षक भएकाले पढ्नुपर्छ भन्ने दबाब थियो। त्यसैले गीत गाउँछु भन्न आँट आउँदैनथ्यो,' उनले भने, 'यस्तो काममा लागे पढाइ बिग्रिन्छ भन्ने समाजको पुरातन धारणा थियो।'
काठमाडौं आइएससी पढेर झापा फर्कँदा उनले गाउँमा कन्सर्ट आयोजना गरे र गीत गाए। आफै नाटक लेखे र निर्देशन गरे। सार्वजनिक रूपमा गीत गाएको त्यो उनको पहिलो अवसर थियो।
बिएससी पढ्न काठमाडौं आएपछि उनले पढाइ र गायनलाई सँगसँगै अघि बढाए।
उनको पहिलो एल्बम खासै चलेको थिएन। दोस्रो एल्बम ठिकै चल्यो। त्यसपछि उनले 'पल पलमा' फिल्मको टाइटल गीत गाउने अवसर पाए। सुरेश अधिकारीको शब्द र महेश खड्काको संगीत रहेको त्यो गीत निकै चल्यो।
उनको अर्को सुपरहिट गीत 'म बिना कसै-कसैलाई' मा पनि महेश खड्काकै संगीत रहेको छ। शब्द शितल गिरीले लेखेका हुन्।
यी दुइटा गीतलाई उनी आफ्नो करिअरको टर्निङ प्वाइन्ट मान्छन्। त्यसपछि उनले एकपछि अर्को हिट गीत दिए। दर्शकहरूको खुब माया पाए। र, सांगीतिक क्षेत्रमा आफ्नो कद अग्लो बनाए।
चर्चित रियालिटी शो 'द भ्वाइस अफ नेपाल' को प्रशिक्षक (कोच) का रूपमा उनले आफ्नो कद थप बढाएका छन्। उनी त्यसको पहिलो सिजनदेखि नै प्रशिक्षक थिए। अहिले उनले त्यो काम छाडेका छन्, तर कतिपय दर्शकले उनलाई त्यही रूपमा खोजिरहेको कार्यक्रमको युट्युब च्यानलमा आएका प्रतिक्रियाबाट बुझिन्छ।
प्रमोद अचेल एकल गायनभन्दा बढी ब्यान्डसँग गाउँछन्। उनको 'प्रमोद खरेल एन्ड परम्परा' ब्यान्डले देश-विदेशमा थुप्रै प्रस्तुति दिइसकेको छ। शुक्रबारबाट फेरि कन्सर्ट लिएर ब्यान्डसहित नेपाल टुरमा निस्किँदै छन्।
पूरा भिडिओ हेर्न यहाँ क्लिक गर्नुहोस्:
